Svarthol Trausta Þorgeirssonar.

Plötuspilari

2011-01-13T08:30:00.003Z

Í desember kom ég við á Íþökusafni niðri í skóla. Að þessu sinni fékk ég að líta við í hið læsta rými sem merkt er PLÖTUSAFN. Þar inni er mikið magn óskráðra og óflokkaðra vínylplatna af ýmsum stefnum. Ég tók í þetta sinn tvær plötur, valið efni úr jólaoratoríunni og fiðlukonsert eftir Bach.

Við nánari skoðun kemur í ljós að jólaoratorían hefur aldrei verið leigð út og líklega aldrei spiluð. Fiðlukonsertarnir voru hins vegar síðast leigðir út árið 1968 af nemanda í 3.B.

Vandamál mitt lá í því að eiga ekki plötuspilara. Þrátt fyrir fréttir um að fjórfalt fleiri plötuspilarar seljist nú en geislaspilarar er ekki um auðugan garð að gresja í þeim efnum. Að lokum fékk ég magnara og plötuspilara frá mömmu, sem amma og afi áttu upphaflega.

Internetið segir að magnarinn sé gæðavara, en plötuspilarinn sjálfur sé "low-end". Fáránlegt.

Við Laufey eyðum nú öllum okkar stundum inni í vinnuherbergi við hlustun hljómplatna. Við reynum að vera yfirlætisleg á svipinn og ræðum saman um að þetta sé nú allt annað líf, miðað við þann illa tónlistarmiðil, geisladiskinn. Pfft.

Laufeyju finnst hljómurinn vera miklu hlýrri og "sannari". Lárus segir að við eigum að kaupa okkur Niflungahringinn. Einungis 19 plötur. Kjarakaup.

Feðraorlof, dagur 1,5

2011-01-05T14:07:00.007Z

Það er mikil ábyrgð sem fylgir því að viðhafa feðralolrofl. Fyrir "fríið" hef ég fengið mikið af spurningum um 'hvernig ég ætli nú að nota tímann', 'hvort ég hafi tekið að mér einhver verkefni' og svo framvegis. Það er hins vegar nokkuð ljóst að það er auðveldlega full vinna að sinna 7 mánaða barni og halda heimilinu í lagi.

Það sem ég hafði aldrei áður haft umsjón með í umönnun Laufeyjar var fataval. Því vandaðist málið strax í morgun. Niðurstaðan var þó þessi:

Um er að ræða langerma samfellu, bol (peysu?) úr P&P ásamt VELÚR-buxum úr sömu verslun. Auk þes er Laufey í sokkum. Síðar dagsins fær hún að fara í sokkabuxur til auka-hlýjunar fyrir blund á svölum. Helsta leiðarljós mitt í fatavali er þetta: Umfram allt, vera hlýtt. Næst: Vera bleik (sbr. ráðleggingar). Þarnæst: Vera í heimaprjónuðu.

Dagurinn í dag byrjaði þægilega. Hildur vakti barnið upp úr 8 rétt áður en hún hélt til vinnu og gaf því að drekka og afhenti það svo föður þess sem lá enn sofandi í rúmi. Laufey og pabbi hennar ákváðu hins vegar í sameiningu að það væri fráleitt kominn dagur enn þá. Því sváfu þau eins og steinar í knúsi til 10:30.

Annars líður dagur bara þannig í boltalandi. Laufey leikur sér töluvert, stundum leikur maður við hana. Stundum reynir maður að blogga.

Laufey kann ýmsar listir. Hún getur ekki skriðið, en hægt er að boltast um á gólfinu með veltum og snúa sér með höndum.

Laufey sækir sér bækur í sófaborðið.

Áfram feðraorlof!

Lán og afborganir

2010-07-07T23:07:00.001Z

Nú hafa lán og afborganir mikið verið í umræðunni síðustu 2 ár. Fólk tekur eftir því að lán hækka þrátt fyrir að alltaf sé staðið í skilum. Hér er verðbólgunni jafnan kennt um sem er rétt upp að vissu marki.

Þau lán sem Íbúðalánasjóður veitir eru verðtryggð jafngreiðslulán, gjarnan kölluð annuitetslán. Þetta hefur í för með sér að afborgun af láni helst jöfn að raunvirði allan lánstímann. Það þýðir líka að afborgun af láni er ekki óviðráðanlega há til að byrja með, sem auðveldar öllum að standa í skilum með slík lán og eiga yfir höfuð efni á þeim.

Vandamálið við lánin eru hins vegar að afborgun af höfuðstól er mjög lág til að byrja með, því þá er aðallega greitt af vöxtum. Það þýðir að jafnvel í frekar lítilli verðbólgu mun lánið hækka. Við sjáum mynd:

Á myndinni má sjá hvernig eftirstöðvar 20 milljóna króna láns þróast, miðað við 40 ára lán (mjög algeng), 5% vexti (það sem er í boði hjá ÍLS) og 3% verðbólgu (rétt yfir markmiði Seðlabankans). -Heimild, reiknivélin hér.

Það sem vekur athygli er að lánið hækkar jafnt og þétt allan fyrri helming lánstímans og fer hæst í rúmar 26 milljónir árið 2030. Það gerist sem sagt þrátt fyrir frekar hóflega verðbólgu.

Eftir hrunið hefur verðbólgan aukist frekar mikið sem hefur haft slæm áhrif á verðtryggð lán. Síðustu 20 ár hefur meðalverðbólga hins vegar verið rétt rúmlega 5%. Skoðum tilsvarandi mynd við þá að ofan m.v. sömu forsendur en 5% verðbólgu:

Hér sjáum við að lánið mun rúmlega tvöfaldast áður en það fer að lækka. Sá sem tæki slíkt lán í dag og gerir ráð fyrir tilsvarandi efnahagsástandi næstu 20 ár og síðustu 20 ár, ætti því ekki að láta það koma sér á óvart þó höfuðstóll láns hans hafi nærri tvöfaldast árið 2030.

Niðurstaða: Sú staðreynd að lán hækka, jafnvel þó staðið sé í skilum, er ekki alltaf bara ríkisstjórninni, hruninu, AGS, og verðtryggingunni að kenna. Um er að ræða innbyggðan eiginleika lánanna sjálfra. Í sjálfu sér þarf þetta ekki að vera vandamál. Lántakandinn lendir "bara" í vandræðum ef lánsupphæðin fer yfir verðgildi húsnæðisins. Þetta getur vel gerst ef húsnæðisverð stendur í stað, eins og á Íslandi núna. Það var hins vegar ekki vandamál þegar húsnæðisverð hækkaði miklu hraðar en verðbólgan eins og staðan var fyrir hrun.

Ósiðleysi

2010-07-06T22:36:00.003Z

Gengið var samkvæmt venju upp Baldursgötuna með barnið í göngutúr. Aldrei þessu vant voru engir siðlosandi bílar lagðir upp á gangstétt. Þegar kom að gatnamótunum við Þórsgötu var þó bíll lagður akkúrat á horninu, sem getur verið nokkuð hamlandi barnavagnaumferð.

Svo heppilega vildi til að stöðuvörður var á staðnum að skrá sekt. Ég sagði við hann: "Það er fimm metra reglan!". Og hann svaraði, kampakátur, "Já einmitt! Þakka þér fyrir!"

Hildi var skemmt; "Þú ert örugglega eini maðurinn á Íslandi sem er með bílastæðavörðunum í liði"

Siðleysi VII

2010-06-21T23:50:00.000Z

Á þessari sláandi mynd sjáum við sláandi hlut:

Hér er greinilega um að ræða samsæri VOLKSWAGEN bílaframleiðlandans til að stemma stigu við umferð barnavagna. Gísli Marteinn, hverju svarar þú? Martin Winterkorn, hvaða siðferði hefur þú?

Siðleysi VI

2010-06-17T18:20:00.000Z

Siðleysingi dagsins er þessi bíll sem lagði ranglega á Baldursgötunni.

Siðleysi V

2010-06-14T18:55:00.000Z

Siðleysingi dagsins er sá sem ákvað að skilja þessa kerru eftir á miðri gangstétt.

Freistandi að draga kerruna bara burt!

Siðleysi IV

2010-06-11T23:00:00.000Z

trausti.blogspot.com þakkar góð viðbrögð við umfjöllun um siðleysi ökumanna samfélagsins. Í því sambandi er rétt að hnykkja á góðri tillögu Unnars Þórs á BETRI REYKJAVÍK.

Siðferðisbrestur dagsins er í boði FORD KA sem lagt var við Baldursgötu.

Siðleysi III

2010-06-10T23:20:00.001Z

Enn einu sinni lítum við á dæmi um lágan siðferðisþroska íslenskrar yfirstéttar.

Hversu langt á þetta að ganga? Jón Gnarr, hvenær verður skrípaleikurinn stöðvaður? Hvenær á íslenskt alþýðufólk aftur að fá að komast leiðar sinnar í friði fyrir ökuníðingum?

Siðleysi II

2010-06-09T17:39:00.001Z

Leynilögreglubloggið trausti.blogspot.com heldur áfram að fletta ofan af spillingunni og siðleysinu í samfélaginu í kjölfar siðrofsins sem átti sér stað 6.október 2008.

Í dag er röðin komin að þessum yaris sem kaus að leggja samkvæmt eigin hentugleika á Bergstaðastræti. Við sjáum mynd:

Eins og sjá má er ekki nóg með að hinn siðspillti Yaris kjósi að leggja uppi á gangstétt og stöðva þar með örugga umferð barnavagna, heldur kýs hann einnig að blokkera brunahana.

Hvert er þetta samfélag eiginlega að stefna?!

Siðleysi

2010-06-08T23:27:00.001Z

Lítum á annað dæmi um dæmigerða hegðun Íslendinga.

Þess má geta að þrjú stæði voru laus hinum megin við götuna. En nei, ökumaðurinn lætur ekki bjóða sér að leggja 4 metrum lengra frá áfangstaðnum.

Höldum áfram að koma upp um þrjóta í næsta þætti.

Óafsakanleg hegðun ökumanna

2010-06-03T20:32:00.002Z

Siðferði ökumanna að leggja bílum sínum hefur lengi verið eitt áhugamála minna. Sú nýja staða að ganga reglulega um miðbæ Reykjavíkur með barnavagn hefur enn opnað augu mín fyrir hinum landlæga siðferðisbresti Íslendinga. Við sjáum mynd:

Maðurinn með barnavagninn gengur í sakleysi sínu eftir Óðinsgötunni. Eigandi DAIHATSU bifreiðarinnar telur þó eðlilegra að barnavagninn sneiði hjá bílnum út á götu, fremur en að finna sér löglegt stæði. Ekki reyndist unnt að sneiða framhjá bílnum á gangstétt:

Niðurstaða: Leggjum löglega. Reglur eru ekki samdar til að búa til tekjur í ríkissjóð heldur af rökréttum ástæðum.

Vönduð vinnubrögð fjölmiðla

2010-02-17T14:06:00.000Z

Haukur benti mér á þessa grein Óla Tyness á vísi.is. Þarna segir frá skoðanakönnun um fylgi flokkanna sem taka þátt í bresku þingkosningunum.

Við fræðumst um að Íhaldsflokkurinn mælist með um 40% fylgi og "myndi bæta við sig tveim þingsætum ef kosið yrði í dag.". Einnig segir: "Verkamannaflokkurinn er með 29 prósenta fylgi og myndi missa tvö sæti."

Þetta vekur ákveðna furðu í ljósi þess að á breska þinginu sitja 646 þingmenn. Með 13 prósentustiga mun á flokkunum er því frekar skrítið að munurinn á þingmönnum sé ekki meiri. Í kosningunum 2005 náði Verkamannaflokkurinn t.a.m. 158 fleiri sætum en Íhaldsflokkurinn.

Með einfaldri netleit finnum við þessa grein í írsku útgáfu blaðsins Independent. Frétt Óla virðist unnin upp úr téðri grein. Það má sjá af klausu eins og þessari:

"Það vekur hinsvegar athygli að 56 prósent þeirra sem tóku þátt í könnuninni töldu David Cameron leiðtoga Íhaldsflokksins slyngan sölumann, en höfðu nokkrar áhyggjur af því hvernig hann væri undirniðri."

og í írska blaðinu:

Some 56pc agreed with the idea that Mr Cameron was a "slick salesman" but worried about "what he is like underneath".

Misskilningurinn góði um tveggja þingsæta mun virðist sprottinn af þessum orðum:

"The Conservative Party has re-established its double-digit lead over Labour in Britain, according to the latest opinion poll."

Þarna er sum sé talað um "double-digit lead" eða tveggja tölustafa forskot. Það er að segja, Íhaldsflokkurinn hefur meira eða jafnt og 10 prósentustiga fylgi en Verkamannaflokkurinn.

Niðurstaða: Vöndum vinnubrögðin!

Endajaxlataka III

2010-02-03T17:12:00.000Z

Stundum finnst mér ég ekki gera annað en kvíða fyrir endajaxlatöku, fara í endajaxlatöku og jafna mig eftir endajaxlatöku. Í október var annar endajaxlinn dreginn úr efri gómi. Tannlæknirinn gaf í skyn að þeir í neðri gómi myndu valda vandræðum bráðlega. Það stóðst, um miðjan mánuð byrjaði ég að bólgna í gómnum við hlið endajaxla. Það er einkenni á PERICORONITIS.

Ég var sendur beint til kjálkaskurðlæknis. Fyrirfram gaf hann svona í skyn að það væri líklega hægt að taka tönnuna bara úr á staðnum. Svo tók hann röntgenmynd og leist þá ekki eins vel á blikuna "æi er þetta svona, úff við gerum þetta ekki núna!"

Hann gaf mér tíma viku síðar. Ég er búinn að dunda mér við að kvíða þessu á hverjum degi síðan. Flett á interneti leiðir í ljós að endajaxlatökur eru mjög fjölbreyttar. Stundum er hægt að kippa þeim beint úr, en stundum þarf að skera í, sverfa upp beinið, saga jaxlinn í sundur og draga svo brotin úr - Einmitt það sem átti að gera við mig.

Þegar í stólinn var komið byrjaði hann á að deyfa mig eins og ég hef aldrei áður verið deyfður. Ég fann ekkert fyrir hálfu andlitinu mínu. Síðan sýndi hann mér myndina af jaxlinum og tók aðra svona "úff þetta liggur erfiðlega"-ræðu

Samt ákvað hann að "láta reyna aðeins á hann" og prófa að draga hann bara úr. 30 sek. síðar var jaxlinn kominn út. Tannlæknirinn varð steinhissa. Ég ekki síður.

Niðurstaða: Ágæti lesandi sem gúgglaðir endajaxlataka með hnút í maganaum, hérna er allt sem þú þarft að vita: Flestir fá endajaxla á unglingsárum sínum. Endajaxlar eru yfirleitt tilgangslausir, eins og botnlangi. Í mörgum tilfellum er ekki pláss fyrir þá í gómnum. Þess vegna eru þeir teknir. Um er að ræða tvö möguleg stig

Endajaxlinn er enn undir gómnum, liggur mögulega þvert. Tannlæknirinn vill láta taka þá. Hann sendir þig til kjálkaskurðlæknis, sá sker í góminn og rífur dótið úr. Þetta er nokkur aðgerð, þú munt vera nokkra daga að jafna þig, þú munt bólgna í andliti og líða smá kvalir.

Endajaxlinn er að hluta til kominn upp. Í þessu tilviki hefur komið í ljós að ekki er pláss fyrir jaxlinn í munninum. Hann þarf að draga úr. Mögulega dregur tannlæknirinn hann sjálfur. Ef jaxlinn er í efri gómi er það mjög líklegt. Sé hann í neðri gómi er líklegra að kjálkaskurðlæknir geri það til öryggis. Séu ræturnar illa staðsettar þarftu að fara í aðgerð, sjá 1. Sé allt í sómanum dregur tannlæknirinn tönnina úr. Þetta gæti tekið 5 mín. og er venjulega ekkert mál. Þú borðar mjúka fæðu í nokkra daga, bólgnar ekkert og hefur það fínt.

* Þiggið ekki læknisfræðileg ráð frá kennurum/verkfræðinum

..he was the prefect husband

2010-01-08T08:01:00.000Z

Ég fór á Borgarbókasafnið AÐALSAFN einu sinni sem oftar í gær. Ein af nýju DVD myndunum var IN THE VALLEY OF ELAH sem ég ákvað að taka. Koverið lítur svona út:

Glögglega sést að myndin hefur fengið 4 stjörnur á þremur stöðum. Við nánari skoðun kemur þó í ljós að sami aðilinn hefur verið þar að verki, herra LAKJS'LASKADJ, AS'LDKJ.
.

Hvernig ætli þetta sé hugsað?
Sá sem vinnur við að búa til koverið:"Herra yfirmaður, voru einhverjir dómar komnir um myndina?"
Stór yfirmaður með vindil: "Æi skelltu bara fjórum stjörnum á þetta þrisvar sinnum til öryggis. Við hljótum að geta grafið upp einhverja gagnrýendur fyrr eða síðar"

Heill Íslandi til handa!

2009-12-17T11:03:00.000Z

Skemmtilegt lesendabréf í Þjóðviljandum frá 1947 kennir okkur að segja ekki hall-oo, heldur stutt og laggó HALLÓ. (nausðynlegt er að smella á myndina)

Það er frekar töff að kenna mönnum að bera orðið halló rétt fram. Þegar ég var ~~táningur~~ piltur á gelgjuskeiði og í tilhugalífi, voru kennarar bara að fárast yfir framburði á Titanic. Forðast skyldi "Tæ-TE-nik" heldur segja "TÍ-tanik".

Þvaður um Arsenal

2009-12-10T12:35:00.000Z

Í Meistaradeildinni í gær lék Arsenal við gríska liðið Olympiakos. Arsenal hafði tryggt sér sigur í riðlinum og hafði að engu að keppa. Næstu helgi er einnig mikilvægur leikur við Liverpool í Úrvalsdeildinni. Þess vegna tefldi Arsenal fram fáum fastamönnum og gaf ungum leikmönnum tækifæri. Fullkomnlega eðlilegt miðað við aðstæður.

Leikurinn var skemmtilegur. Arsenal var betra liðið, Walcott og Vela klúðruðu 3 dauðafærum en Grikkirnir unnu 1-0. Allt í fína með það.

Sérstakur and-Arsenal penni Fréttablaðsins/Vísis.is notar tækifærið og vitnar í orð Matthias Sammer. Hann þvaðrar e-ð um að þetta sé vanvirðing við Meistaradeildina. Henry Birgir skrifar svo:

Tapið gerði það aftur á móti að verkum að gríska liðið komst áfram á kostnað Standard Liege.

Ehh.. getur ekki verið að Standard hafi ekki komst áfram vegna þess að liðið náði bara jafntefli á móti AZ í gærkvöldi? Heimild. Miðað við þau úrslit hefði engu breytt þó Arsenal hefði sigrað 10-0 í gær, Olympiakos hefði samt komist áfram.

Enn ein ástæðan fyrir því að hætta að nota Visi.is og afþakka Fréttablaðið.

Á akstri

2009-12-05T13:02:00.001Z

Keyrt eftir Bústaðarvegi í átt að Kópavogi.

Trausti: Ég ætla að gerast svokallaður late merger.
Hildur: Eða eins og ég kalla það: douchebag.

Þetta kom dálítið flatt upp á mig.

Morgunblaðið endurtekur fréttir

2009-11-11T08:00:00.000Z

Á laugardaginn birti mbl.is þessa frétt, þar sem fjallað er um "grófustu fótboltakonu í heimi"?

Í gær birtist aftur svipuð frétt undir VERÖLD/FÓLK. Heimild. Við nánari skoðun er fréttin um sama myndbandið. Nú er fyrirsögnin "glíma eða fótbolti?".

Ég hef tekið saman leiðbeiningar um fréttamennsku á 21.öldinni:

1. Náungi úti í bæ tekur saman myndband og setur á jútúb.
2. Mimsunandi fréttamenn vinsælla vefmiðla finna myndbandið, og fjalla um.
3. Goto 2.

Ælti Óli Tynes sé búinn að fjalla um þetta stórmál?

Innheimtuviðvörun og viðskiptahættir Vódafóns.

2009-11-05T17:14:00.002Z

Ég er vanur að borga reikningana mína sem næst eindaga. Á mánudaginn var slíkur dagur á tveimur reikningum frá VODAFONE, fyrir farsíma og internet. Því miður var ég út úr heiminum af völdum nóróveiru slíkan dag og hafði ekki rænu á að borga reikninga.

Ég mundi svo ekki eftir þessu fyrr en í dag og sá þá að VODAFONE hafði verið svo hugulsamt að skella 2*590 kr. INNHEIMTUVIÐVÖRUNnar-gjaldi ofan á reikningana. Ég hringdi og spurði hvað þetta þýddi. Stúlkan sem svaraði sagði efnislega að þetta væri kostnaður við að senda hatursfullt hótunarbréf heim til mín. Ég sagðist ekkert slíkt hafa fengið, en hún bað mig að athuga að pósturinn á Íslandi væri ekki sá hraðasti í heimi.

Fyrir utan þetta borgaði ég e-a tíkalla í dráttarvexti, sem mér finnst allt í lagi. En mér finnst fáránlegt að hafa staðið í skilvísum viðskiptum við fyrirtæki í 10 ár og eiga svo að borga 1180 kr. fyrir e-ð hótunarbréf.

Stúlkunni fannst lítið til koma, það eina sem hún bauðst til að gera var að sameina reikningana tvo, þannig að framvegis þarf ég bara að borga einu sinni 590kr. í INNHEIMTUVIÐVÖRUN...

Ætli þetta hafi e-ð með þetta að gera?

Kvikmyndir og tungumál.

2009-10-23T14:03:00.000Z

Í gærkvöldi fórum við Hildur á nýjustu kvikmynd Almodóvars, Los abrazos rotos. Ég er ekki mæltur á spænsku en á ensku heitir kvikmyndin Broken Embraces. Þetta býr til afar óþægilega klemmu þegar miði er keyptur í miðasölunni. Skynsamlegast er að biðja um miða á frummálinu. Ég tala hins vegar ekki spænsku og veigra mér við að segja "loð abraðóð rótóð". Hinn möguleikinn er að segja enska nafnið. Það er hins vegar kjánalegt, enska kemur málinu ekkert við. Kvikmyndin er á spænsku með íslenskum texta.

Síðasti möguleikinn er að biðja um miða á íslensku, en þá þarf ég að þýða titilinn úr ensku. Hvernig á ég að vita að enski titillinn sé nákvæmur en ekki e-ð staðfært grín. sbr. að önnur hver gamanmynd í Ríkissjónvarpinu heitir "Handagangur í öskjunni" á íslensku.

Aðrir valmöguleikar eru að biðja um miða á "Penelópí myndina" eða "Almodóvar myndina". Eða það sem ég gerði á endanum: "tvo miða í sal eitt takk". Ég lít samt á það sem uppgjöf.

Ég hef ekki verið eins stressaður í miðasölu síðan ég var 13 ára og fór á Phenomenon.

Myndin var annars mjög fín. Meðmæli. Vægi: Mikið.

Vísir.is þarf að átta sig á stöðunni

2009-10-22T14:23:00.000Z

Ég reyni eftir fremsta megni að forðast vefsíðuna visir.is. Önnur ástæðan er sú að þarna inni eru meira en 50% erlendu fréttanna skelflegar "brandara"-fréttir í boði Óla Tynes. Skoðum 3 dæmi frá í gær:

Bangsi bílaþjófur gripinn glóðvolgur
Þannig fara hjónabönd í hundana
Vill gefa fallegum konum afslátt

-Hvílíkar stórfréttir!

Hin ástæðan er auðvitað slúðrið hennar Ellýjar (í dag: Óförðuð Jolie - myndir, hvílík skelfing!)

Afdrifarík mistök voru hins vegar að smella á þessa frétt
Meintar geimverur hlupu um akur í Wiltshire.
Myndatextinn segir: "Hringir eða tákn sem birtust á akri í Silbury Hill í maí eru meðal þúsunda slíkra sem birst hafa víða um heim og ekki hefur tekist að útskýra. Margir telja um gabb að ræða en stærð sumra táknanna hefur skákað þeirri kenningu"

-Þar höfum við það. Þeirri "kenningu" að um gabb sé að ræða hefur verið skákað. Case closed.

Kastljósið þarf að átta sig á stöðunni

2009-10-22T08:13:00.000Z

Lítum á nokkrar múnderingar Þórhalls Gunnarssonar í október:

Hinn ágæti sjónvarpsmaður Þórhallur gerir tvö afdrifarík mistök. Í fyrsta lagi klæðist hann ekki bindi. Það dregur afar mikið úr trúverðugleika ritstjórans og trausti áhorfenda. Aðrir umsjónarmenn slíks þáttar gera þetta ekki heldur.

Hin mistökin er að hneppa ekki jakkanum. Lítum á það sem hinn frábæri bloggari Simon Crompton segir um málið á vefsíðu sinni:

The whole structure of the jacket is built off this button and the shape of the shoulders. The lapels curl down to this button; the line of the suit from armhole to skirt is determined by the placement of this button. It is the fulcrum around which everything else revolves.

This is why men are always told to do up their suit jackets when standing. If they don’t, they might as well not wear a jacket that fits. All the tailoring is built off the shape created when the button is fastened.

Ég á ekki von á að öðru en að Þórhallur taki þetta til greina í næsta þætti. Hann var í gráa jakkanum síðast, hlýtur að vera í þeim svarta næst. Spennan liggur aðallega í því hvort hann verði í gráa eða svarta vestinu (peysu?) undir. Ég iða í skinninu.

Á bókasafninu

2009-10-20T08:17:00.001Z

Í lok sumars uppgötvaði ég Borgarbókasafnið aftur eftir langt hlé og hef stundað dálítið regulega síðan. Ég kann yfirleitt vel við mig í bókabúðum og mér líkar vel við bókasöfn svona í prinsippinu. Að finna hluti þar getur hins vegar gert mann sturla(ðan) böðvarson.

Í dag fór ég með það markmið að ná mér í bókina The Yiddish policemen's union eftir Michael Chabon. Leit á Gegnir.is benti til þess að hún væri til á Aðalsafninu. "Staðsetning: 830 Cha Yid." Hvað getur verið svona flókið?

Ég veit ekki nógu mikið, en 830 virðist vera almennur flokkur fyrir allar heimsins bækur á ensku. Þeim er því raðað á a.m.k. 4 mismunandi vegu í stafrófsröð eftir eftirnafni höfundar.
Ég byrjaði á að leita í scifi/fantasy hillunum. Ekki þar.
Næst scifi/fantasy hillunum fyrir börn (Já þetta er gert svona). Ekki þar.
Næst í spennusagna hillunum. Ekki þar.
Næst í e-u sem virðist vera óskilgreindur afgangur án þess að það sé útskýrt neitt frekar: Já! Hún var þar.

Ekki nóg með að maður þurfi að leita á 4 mismunandi stöðum án þess að neitt leiðbeini manni þá er ekki auðveldast í heimi að átta sig á því hvar einn flokkurinn byrjar og hinn endar. Auk þess er stafrófsröðin á milli rekka oft óskiljanleg.

Hinn möguleikinn hefði verið að leita aðstoðar bókavarðar. Það er aðeins fyrir lengra komna. Meira um það síðar.

Niðurstaða: Ég fékk bókina sem ég var að leita að. Hættu þessu væli.

Egill Helgason reynir á heila ritstjórnar og útgefanda AMX

2009-10-15T10:55:00.001Z

Fáir virðast valda ritstjórn og útgefanda AMX meira hugarangri en Egill Helgason. Má halda því fram að Egill hafi lagst á sinnið á þeim. Varla er hægt að opna vef Amx öðruvísi en þar sé fjallað um Egil og Silfur Egils.

trausti.blogspot.com hefur aldrei skilið þá miklu heift sem útgefandi AMX sýnir Agli Helgasyni eða það mikla hatur sem ritstjórar ber til kollega sinna á Silfri Egils. En eins og sagt er, það er þeirra vandamál.

trausti.blogspot.com gerði litla úttekt á skrifum Fuglahvísls AMX frá stofnun vefritsins til að kanna hversu oft hefur verið fjallað um Egil. Ekki er um vísindalega úttekt að ræða og margt hefur örugglega farið framhjá trausta.blogspot.com við þessa athugun. En eftir smá yfirlegu komst trausti.blogspot.com að því að Fuglahvísl skipta tugum á þessum mánuðum. Yfir 100 fuglahvísl- hvorki meira né minna. Ótrúlegt og þá skal hafa í huga að ekki er allt talið.

En trausti.blogspot.com taldi rétt að birta stutt ágrip af því efni sem þeir tóku saman:

Egill Helgason með æluna upp í kok

Egill Helgason í stjórnmál?

Egill Helgason: Tvö stefnumál Samfylkingarinnar

Egill Helgason móðgaður – niður með Dominique Strauss Kahn

Egill Helgason með Guðlaugi Þór?

Egill Helgason hyggur á landflótta

Egill, Þráinn og Ástþór í sama þátt

Egill í uppnámi

Egill blindaður af ESB afhendir röngum flokki pálmann

Egill vill ekki íslenskan landbúnað

Þýtt og staðfært héðan.

Órökrétt hegðun

2009-10-14T08:07:00.001Z

Þegar ég var að læra að keyra bíl á síðustu öld sagði ökukennarinn minn mér, (á einum af þeim fáu augnablikum sem hann var ekki að tala í farsímann), að "það kostaði um það bil einn kaffibolla af bensíni að ræsa hreyfilinn". Ég hef aðeins brotið heilann um það af hverju kaffibolli væri hentug mælieining í þessu samhengi, en í praxís þýddi þetta að væri ætlunin að stöðva bílinn í minna en svona 2 mínútur, borgaði sig ekki að drepa á vélinni.

Þessi vitneskja hefur haft þær afleiðingar að mér finnst mjög sárt að slökkva á vélinni og kveikja aftur áður en tvær mínútur hafa liðið. Hvílík sóun. Órökrétta hegðunin felst í því að við slíkar aðstæður, bíð ég stundum þangað til tvær mínútur hafa liðið með að kveikja aftur á vélinni. Yfirleitt geri ég ekkert uppbyggilegra á meðan en að stara á klukkuna í bílnum. Þannig laga ég alheimsjafnvægið.

Ég var með annað dæmi í huga um tilsvarandi órökrétta hegðun mína þegar ég byrjaði á þessari færslu. Ekki lengur.

Eggjasuðuvísindi

2009-10-13T07:53:00.000Z

Internetið bregst manni aldrei þegar skortir ítarupplýsingar. Hér er afar mikilvæg vísindagrein frá eðlisfræðideild háskólans í Exeter um suðu á eggjum.

Við sjáum mynd (sem ég vísa beint á, í siðleysi mínu):
Hér sjáum við glögglega hvernig bera skal sig að við lineggjasuðu. Græna línan sýnir egg sem kemur í ísskáp, en sú rauða egg sem hefur suðu við stofuhita. Segjum að um sé að ræða 60gr. egg. Slíkt egg þarf að sjóða í 4,5 mín. komi það beint úr ísskáp, en aðeins í rúmlega 3 mín. komi það beint af borði.

Hér er líka ágætis umræða. Vísar á forrit sem reiknar fyrir mann suðutímann.

Eggjasuðutæki

2009-10-12T13:28:00.000Z

Eitt af þeim heimilistækjum sem ég ólst upp með var eggjasuðutæki.

Maður raðar eggjum í bakkann, hellir gefnu magni af vatni í plötuna, ýtir á takka og fyrr en varir eru eggin soðin eftir smekk.

Það kom mér því mjög á óvart síðar meir að til væru fleiri aðferðir til að linsjóða egg. Í heimilisfræði í 10.bekk var mér uppálagt að linsjóða egg. Ég spurði kennarann hvar eggjasuðutækið væri og hún átt ekki til orð. Ég átti bara að sjóða eggin í potti. Þetta fannst mér mjög merkilegt.

Síðustu daga hef ég linsoðið egg nokkrum sinnum í potti. Þetta er erfiðara en að segja það. Ef maður tekur ekki tímann nákvæmlega verður eggið harðsoðið.

Eggjasuðutæki vantar greinilega á mitt heimili. Mér líst dálítið vel á þessa græju. "Elektrónískur skynjari; getur valið um harðsoðið niður í linsoðið". Það er líka með on/off takka!

Þegar nei þýddi ekki nei

2009-10-10T16:31:00.000Z

Lesendabréf í DV 1995:

Það er ekkert annað!

Hvaða hlutir fjúka í óveðri?

2009-10-09T12:19:00.000Z

Við drifum okkur upp í bústað til að nýta hausthléið. Vindur var aðeins farinn að aukast í gærkvöldi en ekkert alvarlega þó. Í morgun vaknaði ég kl. 6 við að húsið nötraði.

Í morgunóráðinu hafði ég aðallega áhyggjur af því að bíllinn myndi fjúka á húsið. Samkvæmt internetinu er ekki hætta á því fyrr en vindhraði nær 257km/klst. Sem jafngildir rúmlega 71 metra á sekúndu.

Þá fylgist maður bara spenntur með veðurathugunum frá Þingvöllum. Hviðurnar hafa mest náð 33m/s svo pusjóin er ekki í hættu enn. Húrra fyrir internetinu!

Endajaxlataka

2009-10-08T19:00:00.001Z

Fyrir 6 árum byrjaði endajaxl í efri gómi að angra kinnina mína. Jaxlinn skagaði út, myndaði flipa í kinninni og þetta var allt mjög óþægilegt. Í kjölfarið reif tannlæknirinn tönnina úr. Það var voðalega lítið mál þó það hafi ekki beint verið þægilegt.

Á dögunum byrjuðu svipaðir hlutir að gerast hinum megin í munninum. Um tíma óttaðist ég reyndar að í þetta skiptið væri það neðrigómsjaxl. Það kemur í ljós að grundvallarmunur er á efrigómsjöxlum og neðrigómsjöxlum. Þá úr neðrigómi er ekki einfalt að draga úr heldur þarf aðgerð sbr. hreyfimynd hér að neðan:

Það er nákvæmlega ekkert sem ég óttast meira. Því var það léttir að það var aftur efrigómsjaxl sem var að trufla mig. Tannlæknirinn kippti honum út án mikilli vandræða. Ég fékk að sjálfsögðu að eiga jaxlinn:

Hann mun vera óvenjulegur í laginu, en slíkir endajaxlar eru víst mikil ólíkindatól og óútreiknanlegir.

Þegar maður hefur gat í gómnum er ekki hægt að borða hvað sem er. Mér þykir barnamatur sem betur fer góður. Ég varð reyndar dálítið hissa á úrvalinu í Krónunni. Það var allt vaðandi í mjög ógirnilegum mötum. Hvern langar í þetta?

Grænmeti og kalkúnn? Fáránlegt.

Sem betur fer var líka peru- og eplamauk í boði. Auk þess hef ég gætt mér á linsoðnum eggjum. Það er afar vanmetinn matur.

Tannlæknirinn minn segir að endajaxlarnir í neðri gómi séu dæmdir til að valda mér vandræðum fyrr en síðar. Þá getur maður engst yfir þessu næstu árin.

Björgum Ingólfstorgi.

2009-09-29T15:48:00.000Z

Reykjavík kl. 15:45.

Hlutverk nýs ritstjóra Morgunblaðsins

2009-09-23T11:58:00.000Z

Morgunblaðið er langbesta dagblaðið á Íslandi í dag. Einhvern tímann hætti Fréttablaðið er vera lestrarhæft og Mogginn fór að bera höfuð og herðar yfir tilsvarandi fjölmiðla. Ég mun hins vegar ekki sakna Ólafs Stephensens úr ritstjórastólnum.

Eins og lesendur vita er Ólafur ókrýndur furðufréttakonungur íslenskra fjölmiðla. Heimild. Helsta ritstjórnarbreytingin með komu hans á Moggann var innleiðing furðufrétta á forsíðu.

Ólafur sagði líka að hann liti á mbl.is sem sama miðilinn og Morgunblaðið. Það vill hins vegar þannig til að meirihluti frétta mbl.is er drasl. Haukur benti mér á þessa frétt sem birtist í gær. Óborganleg furðufrétt. Gallinn við þetta er hins vegar að þetta er eldgömul frétt, birtist árið 2005 á BBC. Heimild.

Eins og bent er á hér virðist fréttin hafa poppað upp á mest-lesnu fréttum BBC. Fréttamenn mbl.is drífa bara í að þýða hugsunarlaust upp það sem þeir sjá og birta á sínum vef. Þetta eru ólíðandi vinnubrögð.

Ef ég væri ráðinn ritstjóri Moggans yrði fyrsta verk mitt að gefa út þessa tilskipun:

Allir blaðamenn á launaskrá sem hafa það í starfslýsingu sinni að hanga á news.bbc.co.uk og pikka út 'fyndnar' fréttir, þýða þær á íslensku og birta á vef Morgunblaðsins, eru hér með beðnir um að mæta ekki framar í vinnuna.

Ætti að spara u.þ.b. helminginn af launakostnaðinum.

Titlatog

2009-09-18T15:10:00.000Z

Ein af ánægjulegum niðurstöðum síðasta veturs var að fá loksins starfsheiti eftir áralangt puð í háskóla. Eftir afhendingu prófskírteina sendi ég því umsókn um starfsleyfi til tveggja Katrína. Ka'Jak í Menntamálaráðuneyti og Ka'Júl í Iðnaðarráðuneyti.

Ka'Jak var fyrri til að svara og fljótlega fékk ég þetta fína leyfisbréf (sem ég á reyndar enn eftir að setja upp á vegg). Egóinu var svo þjónað með því að uppfæra skráningu mína í símaskránni. Heimild.

Ka'Júl tók sér sinn sweet tíma. Eftir 3 mánaða ferli fæ ég loksins bréf frá Verkfræðingafélaginu, sem er til umsagnar um hvort eitthvað hafi nú verið að marka þetta nám mitt, svo merkt:

Ekki á hverjum degi sem maður er kallaður "Hr. verkfræðingur"

Ka'Jak sendi mér bara leyfisbréfið beint heim en Ka'Júl sendi mér bréf og vildi láta mig sækja það. Ég gerði ráð fyrir að hún vildi fá mig í fótó-opp. Sá fyrir fréttina á vefsíðunni: "Ungur verkfræðingur fær starfsleyfi, hinn alþýðlegi iðnaðarráðherra afhenti honum bréfið persónulega."

Mætti með bindi og allt í ráðuneytið, en neinei, þá var það bara stelpa á símanum sem rétti mér bréfið í gegnum lúgu á glugga-skilrúmi. Ákveðinn bónus samt að fá nafn sitt skráð á þessa vefsíðu.

Nú er eini höfuðverkurinn að ákveða skráninguna í símaskrána. "Trausti Þorgeirsson, framhaldsskólakennari og verkfræðingur" er frekar langt og leiðinlegt. "Trausti Þorgeirsson, verkfr" væri gamli stíllinn. Það eru 656 manns skráðir í símaksrána sem "verkfr" en bara 393 sem "verkfræðingur".

Spurning um að halda sig við Hr. verkfræðingur bara. "Trausti Þorgeirsson, hr. verkfræðingur"

Good old mountain dew

2009-09-14T07:50:00.000Z

Við fórum á ameríska (eða eru þeir bandarískir?) daga í Hagkaupum á laugardaginn. Reyndar gerðum við okkur sérstaka ferð í Smáralindina í þessum erindum. Fyrirmyndarneytendur. Neysla áfram, ekkert stopp.

Þetta var nokkuð vel gert hjá þeim í þetta skipti. Ég þoli ekki þegar það eru danskir dagar og búðin er skreytt með dönskum flöggum og svo er einn kassi af jolly cola allt danska vöruúrvalið.

Ég var aðallega spenntur fyrir gosinu og keypti allt sem var í boði:

Mountain Dew: CODE RED

Wild cherry pepsi

Sunkist

A&W rótarbjór með vanillu

A&W rótarbjór

vanillukók

kirsuberjakók

Gæðaröð á því sem smakkað hefur verið:
rótarbjór m/ vanillu > kirsuberjakók > vanillukók >mountain dew

Mountain dewið var vægast sagt ógeðslegt. Ég er ekki frá því að þetta sé versti gosdrykkur sem ég hef smakkað. Kirsuberjakókið og vanillukókið voru vonbrigði. Myndi ekki kaupa aftur. Ég er rétt að byrja að læra að meta rótarbjór, vanillubragðið var ágætt en ég held að orginallinn sé betri.

Ég hef annars miklar væntingar til sunkist. Minnist þess þegar slíkur drykkur fékkst í æsku minni. Framhald í næsta þætti.

Uppljómun

2009-09-11T14:13:00.000Z

Fyrir veturinn uppfærði ég kennslubók í tölvufræðinni fyrir MRingana. Það er sífellt verið að biðja nemendur um að vinna með texta, en fyrst þurfa þeir að velja hann, blokka hann, sverta hann. Þessi hugtök voru notuð sitt á hvað. Margir botnuðu ekkert í hvað það er að blokka eða velja texta. Að sverta texta var (skiljanlega) túlkað þannig að það ætti að BOLDa hann.

Á ensku er talað um að highlight-a texta. Ég ákvað því að samræma þessi hugtök í "ljóma upp" texta. Þetta er að falla í góðan jarðveg. Nemendur heyrast segja "Neinei, þetta gengur ekki! Þú verður að ljóma þetta upp fyrst!"

Bráðum förum við svo að ljóma upp reiti í Excel. Aldrei að vita nema í kjölfarið verði flýtifyllt í aðra reiti.

Húsið þar sem menn missa vitið

2009-09-08T20:25:00.000Z

Allt þar til fyrir skömmu stundaði ég líkamsrækt í sölum Þrekhússins. Í eina tíð var slíkt slíkt fyrirbæri mikið veldi. Líkamsræktarkort gilti í Sporthúsi, Þrekhúsi, Betrunarhúsi og víða um land.

Einhvern tímann byrjaði þó að halla undan fæti og Þrekhúsið stóð eitt. Í einhver ár gekk það þannig og hentaði mér og mínum ágætlega að stunda líkamsrækt í heimilislegri lítilli stöð.

Í sumar hætti slíkt batterí þó rekstri. Viðskiptavinum var bent á að kort þeirra væru virk í World Class úti á Nesi í staðinn. Ég var með boðskort í slíka stöð á þeim tíma svo ég hafði ekki fyrir að tala við neinn um mín mál strax.

Um 10.ágúst ætlaði ég að virkja kortið í WC. Kemur í ljóst að ég var ekki á listanum sem Þrekhús gaf út með sínum klíentum. WC ætlaði að athuga málin betur. Nokkrum dögum síðar hafði ekkert komið út úr því. Mér var bent á að hafa samband við BAÐHÚSIÐ. Slíkt fyrirbæri stendur fyrir leifunum af ISF veldinu. Ég fór þangað og jú viti menn, ég var þar á skrá.

Konan þar prentaði út fyrir mig og stimplaði staðfestingu á korteign minni í Þrekhúsinu með gildistíma út nóvember. Ég fór með slíkt bréf aftur í WC Seltjarnaresi. Þar talaði ég við mann sem sagði að "það væru skýr skilaboð frá eiganda WC að engin slík plögg væru tekin gild." Mér var bent á að tala við skrifstofu WC

Daginn eftir fer ég þangað með staðfestinguna góðu. Viðmælandinn þar hafði ekki umboð til að gera neitt en benti mér á að tala við stöðvarstjórann hjá WC seltjarnesi daginn eftir. Ég geri það og hún bendir mér aftur á að tala við skrifstofu WC. Þar með erum við komin tvisvar í hring.

Þegar ég tala enn við skrifstofu WC er mér sagt að sú ákvörðun standi að stimplaða staðfestingin mín væri eitthvað sem þeir tækju ekki mark á og ekkert væri hægt að gera.

Nú erum við að nálgast lok ágúst og engin líkamsrækt verið stundið í margar vikur. Ég tala því aftur við Baðhúsið. Þar ræðir við mig elskuleg kona sem segir að þetta mál sé einfalt að leysa. Hún tali bara við "eiganda" Þrekhússins, sem tali við eiganda World Class, og málin leysist bara. Þetta gæti þó tekið nokkra daga.

Viku síðar er kortið mitt ekki enn orðið virkt í WC. Ég hringi aftur í Baðhúsið, þar á bæ botna menn ekki í seinaganginum og ætla að ræða aftur við Þrekhússmanninn. Þrír daga líða og ekkert gerist. Ég hringi aftur og þá ætlar viðmælandinn að setja eiganda Baðhússins, beint í málið.

Enn líður helgi og ekkert gerist. Í dag hringi ég enn í Baðhús og fæ samband við eiganda Baðhússins. Hún segir að þetta mál komi sér ekkert við og bendir mér á að hafa samband við Þrekhúsmaninn(sem ég hafði reynt að fá að gera lengi), en vill þó aðeins gefa mér upp tölvupóstfangið hans. Ég sendi honum bréf í hádeginu og bíð nú átekta.

Það er búið að vera pirrandi að geta ekki stundað líkamsrækt í meira en mánuð. Það er þó enn meira pirrandi að fólk 1. Ásaki mig um að ljúga, 2. Sé dónalegt við mig. 3. Segist ætla að hafa samband við mig og gerir það ekki.

Viðmótið í World Class var allavega afleitt. Þeir höfðu mjög auðveldlega getað tekið þessa staðfestingu frá Baðhúsinu trúanlega og gleymt þessu. Ég hefði eflaust endurnýjað kortið mitt hjá þeim í lok nóvember. Upp frá þessu dettur mér ekki í hug að kaupa kort hjá þeim.

tl;dr Allir eru vondir við mig.

Ofurraunsæ sundrýni

2009-09-07T20:00:00.002Z

I.
Þarliðinn laugardag fórum við Hildur í hina nýju sundlaug á Álftanesi sem sagt er að hafi sett viðkomandi sveitarfélag á hausinn. Það var ekki erfitt að ramba á laugina þar sem rennibrautin virðist vera hæsti punkturinn á nesinu.

Alvarlegur bílastæðavandi var fyrir utan laugina og var mér meinilla við að skilja bílinn eftir á kaótísku malarplani. Þegar aðgangseyrir hafði verið greiddur var hægt að ganga beint inn í klefa þar sem lyklarnir voru í skápunum. Undarleg vinnubrögð þar sem hver sem er getur þannig valsað beint inn í klefa.

Klefarnir sjálfir reyndust óviðunandi og munaði mestu um skort á vigt. Það er algjört grundvallaratriði að hafa vigt í hverri sundlaug. Er þetta kannski tilskipun frá Dr. Ólafi? Vill hann ekki þurfa að horfast í augu við þyngd sína í sundi?

Laugin sjálf olli nokkrum vonbrigðum. Sólarstrandarleg öldulaug stóð varla undir nafni. Kannski var bara ekki kveikt á henni. Hver veit, það var allavega enginn til að fræða mann um hluti þarna.

Hápunktur ferðarinnar var svo þyrnikóróna sköpunarverksins, stærsta rennibraut á Íslandi. Gangan upp stigann var í takt við það afar köld. Bessastaðahreppur mætti sjá sóma sinn í að setja veggi í kringum hringstigann. Ferðin niður rennibrautina reyndist ánægjuleg, en ekki sérlega eftirminnileg.

Niðurstaða: Álftaneslaug, vægi ekkert.

II.
Liðinn laugardag var farið í Sundhöll Reykjavíkur. Slík laug telst nú local-sundlaugin mín. Það sem sló mig fyrst við komuna þangað var að auglýsingin með hálfnöktu konunni fyrir ofan stigann niður í kvennaklafann var hvergi sjáanleg. Algjör skandall.

Ég fékk í fyrsta skipti heilan klefa til að afklæðast. Hafði ekki gert mér grein fyrir að ég væri kominn í þá lávarðadeild. Aldurinn færist yfir. Á leiðinni í sturtuklefann fékk ég þó næsta sjokk; Gamla lóðavigtin var horfin og pínulítil stafræn vigt tekin yfir. Nú er ljóst að einhver vigt er betri en engin, en það er afleitt að þetta menningarverðmæti sé ekki lengur að störfum.

Við komuna í aðallaugina var stóra brettið opið. Ég skellti mér nokkur stökk. Eftir fyrstu 3 hafði ég svo mannað mig upp í að stinga mér. Það var afskaplega ánægjulegt. Mér var hins vegar nokkuð brugðið að sjá lítinn, kannski 5 ára strák, með armkúta skoppa upp á brettið og taka heljarstökk út í laugina. Þessi æska.

Heitu pottarnir úti stóðu fyrir sínu. Frá því ég kom síðast höfðu þó pottarnir tveir skipt um hlutverk. Sá heiti fyrir innan var nú alþýðupotturinn við 38°C en hinn nærri var við rúmar 40 gráður. Þetta meikar líklega sens þar sem sá innri er ívið stærri að flatarmáli.

Niðurstaða: Sundhöllin í Reykjavík býður upp á besta andrúmsloftið til sundafslöppunar. Til sunds er hún þó sennilega ekkert sérlega heppileg; Vægi mikið.

tl;dr: Álftaneslaug er léleg, Sundhöllin er frábær.

A Thingvöllum

2009-07-17T18:44:00.001Z

Hildur uppi a Midfelli.

I Flatey

2009-07-10T19:11:00.000Z

Konrad og Larus sleikja solina. Mesta blida i heiminum.

Hljodaklettar

2009-07-01T20:22:00.000Z

Hildur og Jökulsá í Hljódaklettum. Stórbrotinn stadur.

Rosalegur hiti i dag. 25¤C . Nuna klukkan 20:20 eru allir enn uti berir ad ofan. Áfram landsbyggdin!

Skjalfandi

2009-07-01T01:00:00.001Z

Hildur med ilmandi thorsk a grillid. Ragnar heradslæknir fylgist náid med. Fiskimidin voru gjöful tetta kvöld. Vid fengum um 50 fiska en hirtum fáa.

I Asbyrgi

2009-06-30T17:36:00.001Z

Hildur pumpar upp vindsængina.

I Hrisey

2009-06-29T21:08:00.000Z

Stemmarinn i Hrisey er engum likur.

Ringo Starr

2009-06-12T23:40:00.000Z

Hinn íslenski aðdáendaklúbbur Teds Dansons stóð fyrir kvikmyndasýningu í gærkvöldi. Í anda karlmannsleika Dansons var kvöldið til heiðurs mikilmenninu Ringo Starr.

Svo sem kunnugt er reis frægðarsól Ringos hæst með hinum síkátu Bítlum. Færri vita þó að Ringo er einnig að góðu kunnu fyrir kvikmyndaleik sinn. Því var var séð ein af hans bestu myndum, Caveman.

Caveman má kalla epískt meistaraverk. Þegar séðar eru slíkar myndir er gaman að fletta upp umfjöllun íslenskra fjölmiðla á timarit.is. Í Visi birtist þessi opna um Ringo árið 1981 (einhver leiðinda DJvu viðbót nausynleg). Það sem er skemmtilegt í þessu er þetta:

Í þessu viðali, sem er þýtt upp úr e-u bandarísku tímariti sem kallað er US, er þýðandinn/ritstjórinn s.s. að hnykkja á þeirri ósk sinni að vonandi muni eina sjónvarpsstöðin á landinu ekki taka tiltekna sjónvarpsþætti til sýninga.
Skemmtilegt!

Minnisregla

2009-06-05T22:40:00.000Z

Það hafa margir komið að máli við mig og hringt og lýst yfir ánægju með síðustu færslu um breytingar á milli punda og kílógramma. Eitt skeytið hljómar svo:

sæll trausti og takk fyrir góðan blogg. eitt sem ég er að pæla úr því það er ekki nóg að deila bara í tvennt til að breyta pundum í kíló, kanntu þá einhverja aðra aðferð eða?

Ég þakka lesanda góð viðbrögð og þessari spurningu er auðvarað. Ómar Ragnarsson kenndi eftirfarandi reglu í miðri lýsingu á boxbardaga á Sýn á sínum tíma:

1. Deilið pundafjöldanum í tvennt. Dæmi: Einstaklingur er 200 pund: 200/2 = 100.
2. Finnið 10% af útkomunni. Dæmi: 100/10 = 10.
3. Dragið þessa tölu frá hinni fyrr. Dæmi: 100-10 = 90.
Þessi niðurstaða er mjög góð nálgun á rétta tölu.

Í umræddu dæmi fékkst sú niðurstaða að 200 punda maður sé 90 kíló. Samkvæmt þumalputtareglu Skáseins væri viðkomandi 100 kíló. Nákvæmt svar er 90,7 kíló.

Tökum annað dæmi: Einstaklingur er 160 pund.
1. 160/2 = 80
2. 80/10 = 8
3. 80-8 = 72
Nákvæmt svar er 72,6

Niðurstaða: Tileinkum okkur skrefin þrjú: Deiling, prósenta, frádráttur. Einfalt, öruggt, þægilegt.

Þýðendur á Skjáeinum kunna ekki til verka.

2009-06-03T19:57:00.000Z

Í gær horfði ég á hálfan þátt af THE BIGGEST LOSER á Skjáeinum. Þetta er í fyrsta skipti sem ég sé e-ð af slíkum þætti. Þátturinn var með hefðbundnu, niðurlægjandi, raunveruleikaþátta-sniði. Umfjöllunarefnið er fólk sem þjáist af offitu og keppir, í e-m skilningi, að því að grennast sem mest.

Eins og gefur að skilja er í sífellu verið að tala um þyngd fólks í þættinum. Þar sem hann er bandarískur er notast við hið handónýta heimsveldis-eininga-kerfi í stað metrakerfisins.

Í heimsveldiseiningum er notast við pund. Eitt pund er u.þ.b. 0,45 kg. Þannig að þegar þyngd er gefin upp í pundum er hægt að deila í tvennt og fá ágæta nálgun á þyngdina í kílóum. Þetta virkar vel þegar talað er um þyngd stórra hluta, t.d. vörubíls. 10.000 punda vörubíl má alveg kalla 5.000 kílóa vörubíl í sjónvarpi.

Þetta er hins vegar ekki alveg svona auðvelt þegar talað er um þyngd fólks. Í þættinum í gær var kona sem hafði grennst mjög mikið og var að skríða niður fyrir 200 pund. Þýðandinn kallaði þetta 100 kíló. Í rauninni eru 200 pund 90,7 kíló. Þessi nákvæmni skiptir fólk gríðarlegu máli.

Einu sinni sá ég líka þátt af America's Next Top Model (já, ég veit..). Þar var e-r stúlka 140 pund og þýðandinn kallaði hana 70 kíló. Slík kona er í raun 63,5kg.

Niðurstaða: Þetta eru fullkomnlega ólíðandi og óþolandi vinnubrögð. Afsagna er krafist.

2009-06-02T09:12:00.001Z

Upp er runnin tuttugasta og önnur vika ársins. Slík vika markar eiginlegt upphaf sumarfís vors 2009. Sumarfríið skal nýtt til þarfra verka. Að sjálfsögðu vaknað fyrir kl 8 alla daga.

Í morgunmat var ilmandi grísahakk. Slíkt hakk fékk ég á tilboði í Bónusi í gær. Aðeins 500 kr. kílóið. Keypti einn 500gr. bakka og skipti þessu í tvennt. 250gr. af grísahakki sett á pönnu og kryddað með: indian curry, mesquite kryddi og kóríander. Steikist á pönnu þar til vel brúnast, sett á disk og gjarnan snætt með sinnepi.

Annars hafa verið pulsur í kvöldmatinn á þessu heimili svo lengi sem ég get munað. Hildur er að vinna e-ð verkefni á Háskólatorgi og stúdentaráð gaf henni ógrynni af pulsum. Slíkt ráð hafði víst fest kaup á 350 pulsum fyrir "fjölskyldudaginn". Slíkur dagur reyndist þó ekki eins vinsæll og ætla mætti.

Annars er það stefna mín að borða ekki pulsur. Ef einhver spyr, þá borða ég ekki pulsur. Maður bara fúlsar ekki við ókeypis mat. Hver hafnar fríum mat? Enginn, það er hver.

Nema mjólkurafurðum, ég gæti fúlsað við mjólkurafurðum allan daginn, alla daga.

Er Evrópusambandið galdrakarlinn í OZ?

2009-05-19T14:30:00.000Z

Heyrt á kaffistofunni:

Það hefur enginn útskýrt nákvæmlega hvernig þetta Evrópusamband á að bjarga okkur Íslendingum frá glötun. Getur kannski verið að þetta sé eins og í Galdrakarlinum í OZ?

Þar fóru förunautarnir að leita að galdrakarlinum til að útvega sér hugrekki, hjarta, og gáfur. En svo kom í ljós að galdrakarlinn var bara blekking en förunautarnir höfðu fundið það sem þá vantaði í leiðangrinum sjálfum. Er Evrópusambandið kannski galdrakarlinn í OZ?

Fyrirsagnir

2009-04-30T18:10:00.000Z

Forsíða visis.is lítur svona út núna:

Þarna er talað um HEIÐMERKUR-HROTTANA og SUNDLAUGAR-PERRANN. Athyglisverð þróun í blaðamennsku að búa til svona samsett orð um fólk, þó hið síðarnefnda hefði kannski átt að stuðla. Hvað með SUNDLAUGAR-SÓDÓMÍSERARANN? eða SUNDLAUGAR-SLORDÓNANN? Hvað um SUNDLAUGAR-SVÍNIÐ?

Af hverju líka að hætta þarna? Reynir Traustason fær engan stimpil. "Reynir ritstjóri í Hæstarétti: Braut áfengislög" þetta er greinilega ómögulegt. Hvað með "RITSTJÓRA-RAFTURINN í hæstarétti: Braut áfengislög" ?

Eins og alltaf er ég boðinn og búinn að hjálpa fjölmiðlamönnum að vinna vinnuna sína. Ætti að stofna ráðgjafarfyrirtæki.

Furduleg kosningabarátta

2009-04-20T15:49:00.000Z

Thessar auglysingar Framsoknarflokksins eru fullkonlega óskiljanlegar. Hver er bodskapurinn? "Framsókn kann ekki ad skipta a milli lina"?

Já, ég fékk styrki frá bönkunum

2009-04-13T20:48:00.001Z

Árið 2000 þegar bankinn sem núna er þekktur sem -gamli Kaupþing banki- var enn þekktur sem Búnaðarbankinn var ég á bílprófsaldri. Á þeim umbrotatímum sem í gangi voru við lok síðustu aldar var enn allt flæðandi í peningum. Að undirlagi ónefnds aðila sótti ég um styrk til nefnds banka til töku bílprófs.

Skemmst er frá því að segja að ég hlaut styrkinn. Bréf þess efnis barst að heimili mínu og mér tilkynnt að ég gæti nálgast styrkinn í útibúi Búnaðarbanka í Hamraborg. Ég hafði reyndar þegar fengið bílpróf og var að vinna sumarvinnu hjá Bílanaust, Borgartúni. Ég átti hins vegar ekki bíl og hjólaði hvern dag í vinnuna.

Vinna var hins vegar frá 8-18 og því ekki auðvelt að komast í bankann. Ég tók því langt hádegi og hjólaði frá Borgartúni í Hamraborg. MYND:

Ég kom í útibúið, sveittur og góður og stóð frami fyrir hinni aldagömlu spurningu "Gjaldkeri eða þjónustufulltrúi?" (í þá daga var reyndar valmöguleikinn afgreiðsla til líka, minnir mig). Ég veðjaði á þjónustufulltrúa. Það er ekki alveg auðvelt að lýsa þeim aðstæðum þegar móður og másandi 17 ára unglingur með hjálm á hausnum spyr konu í bankavesti "fæ.. ég.. bíl..prófs..styrk.. hjá.. þér?"

Konan kannaðist lítið við málið og fór eitthvað bakvið. Nokkru seinna kemur hún aftur og bendir mér á að tala við annan náunga. Sá fær nafn og kennitölu hjá mér og já, ég á víst að fá peninga, leggur heilar 20.000kr. inn á reikning minn.

En þetta er engin skemmtisaga. Ljóst er að þessi styrkveiting var í hæsta móta óeðlileg og vekur upp spurningar um siðferðisbrest. Ég varð að axla mína ábyrgð. Þessar 20.000 kr. mun ég endurgreiða í þrotabú gamla Kaupþings hið snarasta. Auk þess hvet ég aðra styrkviðtakendur til að gera slíkt hið sama.

Vísindi IV

2009-04-08T20:20:00.000Z

Á mbl.is var í gær þessi hér frétt. Þar fræðumst við um meðallaun í HB Granda:

Starfsmenn HB Granda fengu að meðaltali 9,6 milljónir króna í árslaun á síðasta ári miðað við skráð gengi evrunnar í dag. Það gera um 798 þúsund krónur að meðaltali á mánuði.

Okkur finnst þetta að sjálfsögðu afskaplega rausnarlegt. Með fréttinni er svo mynd af verkafólki, sem væntanlega á að fá 800.000kr. í mánaðarlaun að meðaltali.

Vandamálið er að meðaltal getur verið mjög villandi þegar skoðaður er launasamanburður. Þá er rétt að athuga miðgildi launa, skoða töluna í miðjunni. Vandamálið er að mjög launaháir einstaklingar geta skekkt meðaltalið verulega.

Þetta fræðumst við um í þessari teiknimyndasögu eftir Martin Gardner:

-Smellið á myndina

Niðurstaða: Látum ekki tölfræðina blekkja okkur. Notum rétta mælikvarða.

Vísindi III

2009-04-07T17:12:00.000Z

Tvær fréttir vöktu athygli mína í gær. Hin fyrri var á visi.is, þar sem sérstakur vildarvinur bloggsíðunnar er með "vísinda"frétt. Heimild.

Í greininni segir:

Bletturinn er eitt helsta kennileiti þessarar langstærstu reikistjörnu sólkerfisins en Júpíter er ellefu sinnum stærri en jörðin.

Þvermál júpíters er vissulega 11 sinnum meira en jarðarinnar, en þegar tvær kúlur eru bornar saman er meira vit í að bera saman rúmmálið. Þannig er rúmmál júpíters 1321x meira en rúmmál jarðarinnar. Sem þýðir að hægt væri að setja 1321 jörð inn í júpíter.

Við sjáum mynd:

Þetta sýnir okkur glöggt að þvermálið segir ekki alltaf alla söguna. Þessa lexíu lærði ég þegar ég hélt í æsku minni að litlu skipti hvort keypt væri 16 tommu eða 18 tommu pítsa. Hver er munurinn? Ekki svo mikill ef við hugsum bara um þvermálið. En það sem skiptir máli er í raun flatarmálið.

Reiknum:
16" pítsa. Flatarmál: ((16/2)^2)*pí = 201 fertomma.
18" pítsa. Flatarmál: ((18/2)^2)*pí = 254 fertommur.
18" pítsan er s.s. 25% stærri en 16" pítsan. Reyndar fer heimur versnandi og varla hægt að fá 18" pítsur lengur.

Í næsta þætti: Hvaða önnur frétt vakti athygli mína í gær?

Skattframtalið góða

2009-03-31T19:10:00.002Z

Af hverju eru hlutirnir ekki kallaðir sínum réttu nöfnum?

Jón Bjarnason og Grímur Atlason

2009-03-24T13:08:00.000Z

Bloggandinn hefur ekki verið mikill síðustu daga. Aðallega vegna þess að ég hef haft nóg að skrifa á öðrum vígstöðvum.

Núna var ég hins vegar að horfa á Hrafnaþing á ÍNN. Heimild. Í þessum þætti er Ingvi Hrafn róbóti í iMac tölvu. Það eykur vægi þáttanna töluvert þegar slíkt ástand er ríkjandi.

Í þættinum eru Einar K. Guðfinsson og Jón Bjarnason gestir. Ingvi spyr Jón hvaða hugmyndir hans flokkur hafi fyrir nýja Ísland. Jón segir:

"Við segjum að það eigi að standa vörð um landbúnaðinn og matvælaframleiðsluna, fæðuöryggi, matvælaöryggi. Ríkisstjórnin sem var að fara frá veittist að landbúnaðinum og matvælaörygginu, vildu leyfa taumlausan innflutning á matvörum. Nú viljum við snúa við. Nú á að efla innlendan iðnað. Nú á að kaupa sement frá sementsverksmiðjunni frekar en að flytja inn sement."

Hugsa sér, ríkisstjórnin vildi leyfa "taumlausan innflutning á matvörum"! Hvílík aðför að fæðuörygginu! Hefur það hugtak annars einhverja merkingu?

Á meðan ég var að hlusta á þetta var ég líka að lesa (sökum athyglisbrest) pistil á Smugunni eftir Grím Atlason. Heimild. Þar segir:

Það verður að lækka vexti, draga úr útgjöldum, hækka skatta og fara í mannaflsfrekar framkvæmdir til að snúa hjólunum í gang. Þetta er ábyrg skynsöm og heiðarleg stefna – ekkert annað

Það á s.s. að hækka skatta til að snúa hjólum efnahagslífsins í gang. Þetta er ekki góð hagfræði.

Nýja Ísland mun s.s. bjóða upp á hærri skatta og öflugri sementsverksmiðju. Maður iðar í skinninu.

Prófkjörið

2009-03-11T18:05:00.000Z

Jæja, þá fer listinn manns fyrir prófjkörið að verða tilbúinn. Bráðabirgða-listinn er svona:

Dögg Pálsdóttir

Guðfinnur S. Halldórsson

Grazyna Már Okuniewska

Ingi Björn Albertsson

Guðfinnur S. Halldórsson

Loftur Altice Þorsteinsson

Guðfinnur S. Halldórsson

Kolbrún Baldursdóttir

Annars hefur maður eiginlega ekkert verið ónáðaður af frambjóðendum. Mesta návígi mitt var á Kaffitári á þriðjudaginn þegar ég rakst á Oddnýju Sturludóttur og Skúla Helgason. STARSTRUCK.

Vísindi II

2009-03-05T12:35:00.000Z

Það er komninn sá tími ársins þar sem endurnýja þarf líkamsræktarkort. Í ljósi þess að ég greiði um 50.000kr. á ári í Kennarasamband Íslands athugaði ég hvort þar á bæ séu slík kort niðurgreidd.

Niðurstaðan er nei. Ástæðan er þessi: Væru líkamsræktarkort niðurgreidd væri aðsóknin svo mikið að ekkert væri til skiptana. Gott og vel. En það er athyglisvert að skoða hvað annað hinn ágæti Sjúkrasjóður KÍ niðurgreiðir:

Tökum eftir: Meðferð hjá nuddara, höfuðbeina- og spjaldhryggsjafnara, hómópata, nálastungusérfræðingi eða alexandertæknikennara
Nudd: Allt í lagi,
Höfuðbeina- og spjaldhryggsjöfnun: Gagnslaust bull og gervivísindi.
Hómópati: Gagnslaust bull og gervivísindi
Alexandertækni: Aldrei heyrt um þetta. Internetið segir að þetta snúist e-ð um að sitja rétt, til að lágmarka spennu á vöðvum. Getur meikað sens. Allt svona virðist samt þurfa að tengjast e-u vafasömu:

Þjálfaðir Alexander kennarar nota snertingu til að benda á spennu og losa hana, en það ættu söngkennarar að forðast. Í því felst hætta, því við getum smitað nemandann af okkar eigin spennu (Heimild)

Já, ekki vill maður smita einhvern af spennunni sinni!

Niðurstaða: Niður með gervivísindi.

Kannski i skidagalla!?

2009-02-28T17:16:00.000Z

Eg get bloggad med simanum. A tessari mynd: mac, kassi, kringlan.

Blogga frá tölvupósti. Framtíðin.

2009-02-28T17:11:00.001Z

Eða hvað?

Bloggkenndar spurningar

2009-02-27T08:01:00.000Z

Björn Bjarnason hafði þetta að segja um sprengju sprengidagsviðtalið:

Davíð Oddsson, seðlabankastjóri, sat fyrir svörum hjá Sigmari Guðmundssyni í Kastljósi í kvöld. Hafi þetta átt að vera einvígi, lá Sigmar í valnum. Bloggkenndar spurningar Sigmars ristu of grunnt.

Bloggkenndar er skemmtilegt orð hjá Birni. Hann er líka á heimavelli, enda fann hann upp bloggið.

Nú er bara spurningin hvaða merkingu maður á að leggja í orðið. Ég ætla að reyna:
Bloggkenndar spurningar: Spurningar sem bera þess keim, að koma af hugleiðingum manna á bloggi. Slíkar spurningar eru byggðar á órökstuddum gífuryrðum og óviðunandi í menntaðri umræðu.

Nú er bara að byrja að nota þetta:
Trausti: Jæja, sástu fréttirnar í gær?
Viðmælandi: Já, það er nú meira. Á að endurlífga Kolkrabbann?!?!
Trausti: Þetta er nú dálítið bloggkennd spurning hjá þér.

Trausti: Hvað finnst þér nú um skuldastöðu gömlu bankanna?
Viðmælandi: Er ekki greinilegt að þetta er marklaust eignamat hjá Landsbankanum?!?
Trausti: Þessi bloggkennda spurning þín er ekki svaraverð.

Íslandsbanki færir út kvíarnar

2009-02-26T10:47:00.000Z

Þegar ég horfði á leik Arsenal og Roma á þriðjudaginn vakti það athygli mína að Íslandsbanki auglýsir á búningi Róma manna.

Heimild:

Íslandsbanki hafði sem kunnugt er þetta lógó alllengi.
Heimild:

Á islandsbanki.is er lógóið reyndar enn þá rautt. Það gul/bláa er sennilega bara notað á alþjóðavettvangi.

Einu sinni var reyndar grænt í lógóinu.
Heimild:

Mér finnst græni liturinn gera ansi mikið. Ég krefst þess að þetta lógó verði tekið upp aftur, Ólafur Ísleifsson.

Siðlaust fréttamat

2009-02-25T11:06:00.001Z

Fréttamaðurinn geðþekki, Henry Birgir skrifaði grein á visi.is í gær. Henry, sem er yfirlýstur Man. United maður, snýr þarna miskunnarlaust út úr orðum Wengers og niðurstaðan er óvönduð og hlutdræg grein.

Arsene Wenger, stjóri Arsenal, er augljóslega eitthvað fúll yfir döpru gengi sinna manna í deildinni því hann hefur nú ráðist á andstæðinga sína og sakað þá um að stytta sér leið í áttina að bikurum.

Ráðist á andstæðinga sína?
Hvernig er sú ályktun dregin?

Hann virðist hafa gleymt því að hann er nýbúinn að kaupa Rússan Andrey Arshavin á 15 milljónir punda. Hann virðist einnig hafa gleymt þeirri staðreynd að flestir ungu leikmanna hans koma erlendis frá. Til að mynda verður enginn Englendingur í 18 manna leikmannahópi Arsenal í kvöld.

Þetta er fáránlegur útúrsnúningur og xenófóbía. Punkturinn hjá Wenger er sá að hlutfallslega miklu fleiri Arsenal leikmenn eru aldir upp hjá Arsenal, miðað við önnur lið. Þá skiptir engu máli hvort þeir eru enskir eða ekki.

Í gær var sem sé leikur Arsenal og Roma í meistaradeildinni. Arsenal vann 1-0 í fjörugum leik. Fleiri leikir voru á dagskrá, svo sem Man Utd. - Inter. Sá leikur var í flestum fjölmiðlum hæpaður sem stærsti leikurinn. Það má alveg rökstyðja það, enda um Englands og meistaradeildar-meistara að ræða gegn efsta liðinu í ítölsku deildinni. Hins vegar varð niðurstaðan í slíkum leik 0-0 jafntefli. Það stoppar ekki fjölmiðlana í að halda áfram að eyða öllu púðrinu áfram í umfjölllun um slíkan leik.

Í seinni fréttum sjónvarps var ekki sýnt úr neinum öðrum leik. Fréttablaðið (Henry Birgir aftur) birti þessa frétt um leiki kvöldsins:

smella á mynd fyrir stærri texta

Þarna er hálf blaðsíða tekin í umfjöllun um 0-0 jafntefli. Aðrir leikir eru afgreiddir með þessum orðum "Arsenal vann góðan sigur og Barce gerði jafntefli gegn Lyon" Fáránlega lélegt. Af hverju ekki fjalla um hina leikina. Og ekkert bara Arsenal leikinn! Af hverju er ekkert sagt um leik Atletico Madrid - Porto?

Niðurstaða: Eftirtaldir aðilar þurfa að segja af sér: Allir íþróttafréttamenn á Íslandi.

Útvarp Saga enn

2009-02-24T13:10:00.000Z

Á dögunum gerði ég smá grín að Útvarpi Sögu. Þetta er að vísu eins og að taka sleikjó frá smábarni en ég stenst bara ekki mátið. Nýjasta skoðanakönnunin er athyglisverð:

Nýjasta fréttin er svo sú að íslenskur maður í Danmörku hefur tekið að sér að þýða spádóminn góða yfir á ensku. Gallinn er sá að viðkomandi virðist ekki hafa yfirgripsmikil tök á því máli:

This story is from Johanes George Lee. He is from Scotland and have a home on the Isle of Skye. He look for the future in prediction

2009:

The prime minister of Iceland´s new government, is a woman with white hair [...] The mad man (David) in Central Bank, is going away, but this has not much influence on economic crise of the country.

2010:

Althoug is a better citutation in some rural aeras of Iceland, more employment and not crime and dope

2011:

Bankruptcy of the nation shall bee son.

2012:

It´s looking for oil north east off Iceland. Much hope for find it. Another mostly on bad manners

Þetta hlýtur að vera einhvers konar met!

Farsímasaga

2009-02-23T13:53:00.001Z

Ég fékk nýlega nýjan síma. Fjórða Nokia símann minn. Þetta sendi mig í smá nostalgíu yfir gömlum símum.

Fyrsta símann fékk ég í 17 ára afmælisgjöf árið 2000. Um var að ræða Nokia 3210.

Ég var frekar seinn í símavæðingunni. Flest bekkjarsystkin voru komin með síma þarna. 3210 entist frekar illa. Datt dálítið í jörðina. Loftnetið varð lélegt og hann hætti að halda sambandi.

Næst fékk ég mér hinn sígilda 3310.

Hann entist í svona 2 ár, en bilaði þá. Fór með hann í viðgerð í HÁTÆKNI. Þar týndist hann og ég fékk nýjan í staðinn. Sem var heppilegt.

Sumarið 2005 fórum við til Rómar. Á flustöðinni úti keypti ég 6610i.

Þetta var fysti síminn í lit, með myndavél og svona. Ömurlega lélega myndavél reyndar, en engu síður var gaman að geta bloggað myndum, meðan HEXIA bauð upp á þann fítus.

6610i var frekar traustur og fínn. Að lokum varð þó rafhlaðan léleg, svo hlaða þurfti á hverju kvöldi. Í seinni tíð var ég hættur að nenna því. Næsta síma fékk ég um jólin. 1680 classic. Ódýr sími.

Markmiðið var að fá sér almennilegan 3G síma á þessum tímapunkti. Mér finnst bara verðlagningin á tækjunum og þjónustunni óviðunandi. Svo er ég ósáttur við að það sé ekkert tæki með almennilegri myndavél enn þá.

1680 er að reynast vel. Þarf bara að hlaða hann einu sinni í viku. Lífsgæði.

Flestir vinir mínir hafa átt svo marga síma að þeir geta ekki talið þá. Svona er þessi firrti nútími. Undantekningin er Ragnar Pálsson sem hefur átt sama Matrix-símann í 10 ár. Geri aðrir betur.

Útvarp Saga

2009-02-19T07:59:00.001Z

Ég stilli stundum á Útvarp Sögu í bílnum. Þættirnir eru jafnmisgáfulegir og þeir eru margir. Sigurður G. er með úrvalsþátt. Vísindaþátturinn er fínn. Flest hitt er eiginlega óþægilegt að hlusta á. Um daginn var einhver viðmælandi hjá Arnþrúði Karlsdóttur. Til umræðu var Dagur B. Eggertsson. Viðmælandinn sagði: "Já hann er náttúrulega sjöa". Þetta var þá talnaspekingurinn geðþekki Hermundur Rósinkrans að fara yfir stöðuna.

Á vefsíðu útvarpsstöðvarinnar eru iðulega frekar vandræðalegar skoðanakannanir:

Það hlýtur hins vegar að vera sett einhvers einhvers konar met með pistlinum sem kemur inn í dag. Þar er hinn góðkunni skoski "sjáandi", Johanes George Lee, að setja fram spádóma um Ísland.

Spádómurinn byrjar voðalega almennt eins og allir spádómar; Það verða kosningar, það verður atvinnuleysi, verðbólgan minnkar, Davíð hættir. Veislan byrjar svo fyrir árið 2010:

Skelfilegt ár. Ríkisstjórn sjálfstæðis/Framsóknar, umsnýr öllu sem fyrri ríkisstjórnin gerði. Allar stöður eru pólitíkst skipaðar samkv. helmingaskiptareglu flokkanna. Verðbólga nær 50% Eini atvinnuvegurinn sem blómgast sem aldrei fyrr er dópsala.

2011:

Miklar óeirðir í landinu. Byggingar og jafnvel heilu hverfin brennd í þessum óeirðum. Lögreglan ræður ekki við neitt, þótt hún sé nú öll búin skotvopnum. Útgöngubann í Reykjavík.

2013:

Ísland er endanlega lýst gjaldþrota. Evran kostar 2000 krónur. 150% verðbólga. 20.000 flytja úr landi.

2014:

Ísland óskar eftir aðild að Evrópusambandinu EU. En þessari umsókn er hafnað í Brussel. Alþjóðagjaldeyrissjóðurinn tekur við stjórn landsins, ríkisstjórn og forseti eru rekin úr störfum, og þingið leyst upp. Í lok ársins, taka Bandaríki Norður Ameríku USA. Við stjórn Íslands.

Nú er bara að byrja að hamstra evrur og selja svo með tíföldum hagnaði áður 2013. Annars er ég strax farinn að iða í skinninu eftir að ganga í Bandaríkin!

Kommúnismi

2009-02-17T13:00:00.001Z

Ég hlustaði á Silfur Egils útundan mér á sunnudaginn. Heyrði einhvern mann tala um fjölmiðla og að alltaf væri talað við sömu viðmælendurna og álitsgjafana. Þetta fannst mér áhugavert og skynsamlegt. Svo fór maðurinn að tala um hvað það væri asnalegt að fjölmiðlarnar þættust bara vera frjálsir og óháðir en gæfu bara ekki upp stefnu sína, eins og hans eigið dagblað, Vefritið Nei. Það er nefnilega kommúnskt. Þetta þótti mér minna skynsamlegt.

Maðurinn sagði svo að ekki væri vandamálið að komast að því hvað kommúnismi þýddi, því á vefritinu mætti lesa sér til. Sem ég gerði. Ég smelli á hlekkinn sem segir "Hvað er kommúmismi?" Maður heldur kannski að það komi stutt og laggó útskýring. En nei. Það er manni bent á þessa grein sem er hvorki meira né minna en 5000 orð. Það er erfitt að halda athyglisspani í lestur greinarinnar sem virðist aðallega fjalla um franskar fosetakosningar. Ég held það sé auðveldara að átta sig á stefnu Morgunblaðsins með lestri einna Staksteina en að þvæla sér í gegnum þetta.

En það er ekki öll nótt úti. Annar hlekkur bendir manni á ritstjórnarstefnu NEI
Hér má sjá:

Nei. er kommúnískt í þessum skilningi:
að líta á jafnan rétt allra manna sem upphafsreit hins pólitíska nútíma,
að líta á peningahagkerfi sem breytu en ekki fasta,
að líta á kerfisbundna kúgun sem breytu en ekki fasta,

Ekki eykst skilningur minn. Hvað þýðir að hlutir séu breytur en ekki fastar? Er ekki verið að rugla saman stærðfræði inn í þetta?

Þetta er ekki einu sinni neitt frumlegt. Ég ætla að skilgreina kommúnisma svona:

að líta á peningahagkerfi sem samfellt diffranlegt vigursvið í þrívíðu rúmi en ekki einingarþvervigursvið,
að líta á kerfisbundna kúgun sem einingarsnertil en ekki spegilmynd hjúfurhrings.

Það lesa meira þarna:

Hvaða ákvarðanir sem teknar eru um tekjustofna blaðsins, auglýsingar, áskrift eða frjáls framlög, skulu skoðast með það í huga að þó veröldin öll sé einn stór ókeypis hádegismatur, þá hefur enn ekki spurst til ókeypis peninga.

Allir lesendur kinka íhugulir kolli og hugsa með sér "já, gott að vera með þetta á hreinu."

Vísindi

2009-02-15T20:17:00.000Z

Á einum víðlestnansta vef landsins, visir.is, birtist nýlega frétt um metangas á Mars. Þar segir:

„Vísindamönnunum tókst að greina metangasið með því að beita saman stjörnukíki og innrauðum rófgreini með háu tvístri, segi það hugtak einhverjum eitthvað.“

Ljóst er að um er að ræða flókin vísindaleg hugtök. Blaðamanni finnst þó greinilega fullkomlega eðlilegt og sjálfsagt að opinbera eigin kunnáttuskort á viðfangsefninu. Hann gerir heldur ekki minnstu tilraun til að skýra efnið út fyrir lesendum.

Það er ljóst að viðhorfin í samfélaginu eru sjaldnast hliðholl náttúrufræðigreinum eða skilningi á þeim. Það þykir sjálfsagt að vita ekki muninn á líparíti og basalti. Það er kúl að þekkja ekki þriðja lögmál Newtons. Það er eðlilegt að hafa ekki hugmynd um hver kvaðratrótin af 169 er.

Þetta viðhorf sést sjaldan í öðrum greinum. Það þykir ekki eðlilegt að þekkja ekki Bjart í Sumarhúsum eða Jón Hreggviðsson. Enginn myndi sérstaklega vekja athygli á þekkingarleysi sínu á þessu sviði.

Þetta er óviðunandi ástand. Ég fer fram á vitundarvakningu. Hverju svarar þú, menntamálaráðherra?

Kuldi

2009-02-13T20:30:00.000Z

Á fimmtudagskvöld fór ég út í eftirtéðum klæðnaði:
Að ofan: Bolur, peysa, peysa, peysa, úlpa, trefill, húfa, lúffur.
Að neðan: Síðar nærbuxur, buxur, ullarsokkar, lopasokkar, AlGoretex-skór.

Þrátt fyrir þessar ráðstafanir hefur mér sjaldan verið jafnkalt á æfinni. Hvaða frekari ráðstafanir hefði ég getað gert? Er hægt að klæða sig óendanlega mikið en samt vera kalt? Lærdómur minn er þessi: Sé frost yfir 5 stigum og vindur nokkur, verður þér kalt í öllum tilvikum, óháð því hvaða klæðnaði þú gengur í.

Terýni

2009-02-10T17:48:00.002Z

Í ímynduðum veikindum mínum hef ég beitt einu viðurkenndu aðferð læknavísindanna til að ráða bug á meinum mínum: Te. Almennt séð kýs ég einungis að drekka Yogi te. Nú eru hins vegar allar birgðir lakkrístes og Sweet Thai delight á þrotum. Einungis er til hið ódrekkandi te með kakóbragði.

Talandi um te með kakóbragði. Hlýtur það ekki að vera vitlausasta hugmynd í heimi? Hvað næst? Kakó með tebragði? Súkkulaði með tebragði? Nautasteik með kakóbragði?

Í teskápnum leyndust ilmandi exótísk te. Red Safari Spice® Rooibos Te og Madagascar Vanilla Red Rooibos Te.

Auk Earl gamla Grey.

Madagascar Vanilla Red Rooibos Te reyndist drykkjarhæft og fínt. Red Safari Spice® Rooibos Te var hins vegar óviðunandi. Skemmtilegast er þó að drekka Earl Grey, þegar koffeinneysla er í lagi. Það er samt aðallega af útværum ástæðum.

Svo er bara að passa sig á að missa sig ekki í jarlinum:

Maðurinn með hóstann

2009-02-05T14:10:00.000Z

Einn af mörgum göllum þess að þjást af krónískri ólæknandi lungnabólgu með snert af bronkítis er sú þörf að þurfa að ræskja sig og hósta í tíma og ótíma. Augljóst óhagræði af þessu er hávaði og sóðaskapur.

Annar lúmskari fítus er sá, að sú furðulega samfélagslega hefð að ræsking í námunda við annað fólk er túlkuð sem: "VEITIÐ MÉR ATHYGLI, ÉG ÞARF AÐ SEGJA EITTHVAÐ MIKILVÆGT".

Pínlegt í fleiri tilfellum en maður hefði haldið. Mér finnst það eigi að útvíkka þetta aðeins. Af hverju ekki sama fítus fyrir hnerra? Eða hiksta? Ropa?

Allir læra íslensku

2009-02-04T21:37:00.002Z

Íslendingar hafa mikla trú á að þeir geti gert sig skiljanlega við fólk af erlendum uppruna með því að tala íslensku nógu hægt og hátt.

Bernhöftsbakarí 3.febrúar 2009, kl. 10:51
Trausti: "Ég ætla að fá einn snúð með glassúri"
Afgreiðslustúlka: " ? "
Trausti: "Snúður. Glassúr"
-Afgreiðslustúlka afhendir snúð í poka og rukkar.

Miðaldra kona gengur inn á sviðið
Kona: "Ég ætla að fá hálft niðurskorið franskbrauð. Er það ekki alveg örugglega bakað í dag?"
Stúlka: "?"
Kona: "ER. ÞAÐ. EKKI. BAKAÐ. Í. DAG? "
Stúlka: "?"
Kona: "ÉG KEYPTI BRAUÐ HÉRNA Í GÆR SEM VAR HARÐARA EN SKÓSÓLI. BAKAÐIRÐU ÞETTA BRAUÐ Í DAG EÐA EKKI???"
Stúlka: "Everything is 'í dag' yes "
-Trausti yfirgefur sviðið í flýti

Niðurstaða: Hugsum lengra en nef okkar nær.

Sjálfs-piparúðun

2009-01-29T19:14:00.000Z

Til hvers að fara niður í bæ til að láta meisa sig niður, þegar maður getur náð sömu áhrifum inni í eigin eldhúsi?

Aðferð:

Skerið niður rauðan chili pipar. Gætið þess að handleika sérstaklega belginn með öllum fingrum.
Saxið lauk, frjáls aðferð.
Finnið hin óhjákvæmilegu tár koma, sem fylgja laukssöxun
Nuddið tárin burtu með fingrunum.
Öskrið af sársauka. Íhugið að hringja á sjúkrabíl.
Hellið vatni í augun. Gott trikk er að fylla sundgleraugu af vatni og spenna á sig. Einnig má láta volgt vatn renna í vaskinum og setja augun í bununa

Trausti.blogspot.com tekur ekki ábyrgð á skaða sem lesendur kunna að valda sjálfum sér.

Moggablogg for the world

2009-01-27T13:45:00.000Z

(danish version below)

Today the president, Mr. Grímsson, (or Óli Grís, as Icelanders affectionately know him (literally Óli pig, hehe)) asked the heads of the Left Green and Social Democratic movement to Bessastaðir (where Óli lives, literally Bearplace, hehe) and told them to form a minority government.

People are now wondering who will get to be a minister in this government. Ögmundur Jónasson (Or Ömmi, as he is sometimes known) the head of the BSRB (coalition of the workers of municipalities and state), and congressman for the Left Greens, is likely to be the minister of health. The respected and sharp witted TV star, Egill Helgason, has suggested that we may get some ministers from outside the political parties. This has not often happened in Iceland.

What will the future hold? No one knows. But everyone agrees that the neo-libertarianism is now bankrupt. The respected ex-editor of the respected newspaper, DV, Jónas Kristjánsson says that now two pillars of libertarianism in Icelandic media, Viðskiptablaðið and Morgunblaðið are now published with help of the Icelandic government. A laughable death sentence for a bankrupt policy.

Kære nordiske venner.
Idag den direktør , Hr. Grímsson , ( eller Óli Grís , nemlig Icelanders kærlig kende sig ( ordret Óli gris hehe )) anmodede den ledere i den Igen Grøn og Sociale Demokrati bevægelse hen til Bessastair ( der hvor Óli lever , ordret Bearplace hehe ) og fortalt sig hen til skema en mindretal regering.

Folk er nu gad vide hvem vil nå til være en gesandt heri regering. Ögmundur Jónasson ( eller Ömmi , nemlig han er engang imellem bekendt ) den leder i den BSRB ( koalition i den arbejdere i kommune og påstå ), og kongres nemlig den Igen Grøn , er sandsynlig at blive den gesandt i helbred. Den agtet og skarp witted TV stjerne Egill Helgason , har foreslog at vi må blive noget gesandter udefra den politisk arrangementer. Indeværende har ikke ofte sket i Iceland.

Hvad vil den senere sidde inde med? Ingen kende. Men enhver indvilliger at den neo libertarianism er nu konkurs. Den agtet ab - editor i den agtet avis DV Jónas Kristjánsson siger at nu to postkasse i libertarianism i Icelandic medier Viskiptablai og Morgunblai er nu offentliggjort hos hjælp i den Icelandic regering. EN laughable endeligt idømme nemlig en konkurs politik.

Metafjölmiðlun og Moggabloggið á ensku

2009-01-26T21:30:00.000Z

Það eina sem getur mögulega farið meira í taugarnar á mér en furðufréttir eru fréttir af Íslandi í fréttum erlendra fréttamiðla, í íslenskum fréttum.

Á RÚV áðan var frétt þar sem fréttamaður skrollaði í gegnum news.bbc.co.uk og vakti athygli á þeirri staðreynd að á slíkum fréttamiðli væri sko frétt um Ísland efst!

Þessu tengt: Moggabloggið færir út kvíarnar. Ekki amalegt fyrir tjallann á fá skarpa samfélagsrýni íslenskra bloggara beint í æð:

Now this is over. The Conservative party does not want to get rid of the central bank board.

Maybe it's good for the Conservatives to stand back and gather strength.

They need to rethink where they are heading.... Now the parties are blaming each other for everything... It's astonishing that politicians can't agree on helping companies and homes.

It says everything about current party politics.

Þöggun á mannamáli

2009-01-22T16:30:00.000Z

Fréttir bárust í dag af því að Sigmundi Erni hafi verið sagt upp á Stöð2. 365 miðlar voru ekki lengi að þurrka út öll ummerki þess að hann hafi nokkurn tímann starfað á stöðinni.

Í morgun var þessi auglýsing fyrir VEFTÍVI á visir.is:

Núna um eftirmiðdaginn hefur þessi mynd tekið við:

Stalínísk hreinsun á Sigmundi þarna. Það er reyndar e-ð krípí við þessa mynd af Elínu og Loga. Eru þau alltaf með sama svipinn?

Á vísi í morgun var líka hægt að smella á hið leiðinlega blogg MANNAMÁL. Þarna segir:

This user has elected to delete their account and the content is no longer available.

Einmitt.

Ég hálfpartinn vorkenni SER. Hvað ætli hafi eiginlega gerst?

Sprungna dekkið

2009-01-20T20:20:00.000Z

Framhald úr síðasta þætti

Á leiðinni heim á laugardaginn kom í ljós að sprungið var á bílnum. Ég hafði nú ekki miklar áhyggjur, enda oft skipt um dekk. Hins vegar hafði ég aldrei lent í því að ekki væri varadekk undir farangursgeymslunni.

Því var farið inn í bíl og leiðbeiningarnar sóttar. Þær reyndust á dönsku. Yndislegt. Mér tókst að fletta upp á HJULSKIFT kaflanum. Þar segir:

"Reservehjulet og donkraften tages frem.
Reservehjulet er anbragt i en metalholder under bagagerumet.
-Tag hjulnøglen der er fastsprændt til foringen i bagagerummet
-løsn bolten på reservehjulsholderen, inde i bagagerummet under tæppet, ved hjælp af hjulnøglen
-løft reservehjulsholderen, træk krogen ud og sænk holderen
-Træk boksen med donkraften ud fra reservehjulet

Sem sagt, fyrir utan að komast að því að varadekkið er í geymt í málmg-grind undir bílnum, er þetta gjörsamlega óskiljanlegt.

Það sem kemur í ljós með fikti er þetta: Maður þarf að finna felgulykilinn [hjulnøglen] inni í skottinu. Undir teppinu þar er bolti sem heldur uppi málmgrindinni utan um dekkið. Losa þarf boltann með felgulyklinum. Þá dettur grindin niður. Tjakkurinn [donkraften] er í kassa inni í dekkinu.

Eftir að tjakkur og varadekk voru komin gekk snurðulaust að skipta um dekk.

Niðurstaða: Bú á varadekk sem eru undir bílum. Bú á leiðbeiningar á dönsku.

Í næsta þætti: Fara Trausti og Hildur fara með sprungna dekkið í viðgerð? Hvað segir pólski dekkjaviðgerðarmaðurinn? Verður sett slanga um dekkið? Hverju hvíslaði Óðinn í eyra Baldurs? -Allt þetta og meira til í næsta þætti.

Mótmælarýni

2009-01-19T20:35:00.000Z

Á laugardaginn röltum við Hildur niður í bæ upp úr hádegi og náðum í bílinn á Klapparstíg. Þvældumst aðeins niður í bæ, kíktum í Kolaportið og Eymundsson. Um þessar mundir voru mótmælin að byrja. Á Austurstræti gekk maður með búmmbox um sig miðjan, sem spilaði upptökuna "ÉG STYÐ RÍKISSTJÓRNINA, DAVÍÐ SEM FORSETA" á rípít. Afar hressandi.

Á Austurvelli heyrðum við ágæta ræðu Gylfa Magnússonar. Í boði voru generísk mótmælaspjöld. Mér finnst það nú alveg síðasta sort. Það var reyndar eitt gott spjald sem á stóð "Stöðvum skrípaleikinn".

Á dimmission 2003 var 6Y í gervi vinstri grænna. Eitt kröfuspjaldið okkar var einmitt "Burtu með skrípakallana". Önnur voru "Drepist kúgunarvaldið", "Þjóðnýtum Landsbankann hið snarasta" og "Stöndum vörð um sementsverksmiðjuna". Þegar hefur eitt markmið náðst. Spurning hver staðan á Sementsverksmiðjunni er?

Það var áberandi að fólk lítur á mótmæli sem tilvalinn vettvang til að viðra hunda. Á meðan við stóðum undir ræðu Gylfa voru 5 hundar að tryllast fyrir aftan okkur. Eftir Gylfa fór svo Hörður Torfa að tala. Það var e-r skrípakall að trufla tal hans með teip fyrir munninn. Málfrelsi er einmitt eitt ofnotaðasta orðið núna og enginn virðist skilja hugtakið.

Snjórinn fór að falla af hörku og við héldum leiðar okkar. Niðurstaða: ágætt að prófa mótmæli í fyrsta skipti. Þetta blogg átti reyndar að fjalla um þegar sprakk á bílnum á leiðinni heim. Framhald í næsta þætti.

Námskeið endurmenntunar

2009-01-15T16:45:00.002Z

Við fengum pésa frá Endurmenntun í morgun. Því miður ekkert námskeið um bloggskrif. Í sárabætur er frábær mynd framan á bæklingnum. Þar má sjá reiðan mann sem reynir að lokka fólk á námskeið með útgeislun og reiði sinni.

Ég á ekki ósvipuð föt og hann og ákvað að reyna fyrir mér í módelun. Afrakstur:

Mér tekst ekki að vera alveg jafnreiður. Spurning líka hvernig hann nær að vera svona kinnfiskasoginn. Bítur maður í kinnarnar sínar? Svo næ ég ekki þessum augnsvip án þess að hrukka ennið. Heilt á litið er ég samt nokkuð sáttur. Endurmenntun má leita til mín fyrir bæklinga framtíðarinnar.

Hvað er peysa?

2009-01-13T20:39:00.001Z

Ég kalla þær flíkur sem hafa ermar sem ná niður að úlnlið, og farið er í með því að draga yfir haus, peysur. Sumar slíkar flíkur sem ég klæðist kallar Hildur boli. Ég lít hins vegar á boli sem stutterma-flíkur sem klæðst er innanundir peysum. Hildur lítur svo á að efnisgerð flíkurinnar hafi e-ð með þetta að gera. -Peysa sé ekki gerð úr þunnu bómullarefni.

Ég sit við stofuborðið og rita þessi orð. Ég er klæddur í gallabuxur, kragabol og það sem kallað er flíspeysa. Sú peysa hefur hins vegar rennilás. Af hverju er hún þá ekki jakki? Hvernig skilgreinir maður jakka? Rennd eða hneppt flík sem klæðast má utanyfir skyrtu eða peysu?

Nú stend ég upp og fer í peysu utanyfir kragabolinn. Mér líður eins og flíspeysan mín hafi breyst í flísjakka. -Mér líður mun betur með að hafa þessar skilgreiningar á hreinu.

Uppfært; Hildur gerir athugasemdir
Hildur: "Þetta er náttúrulega rennd peysa sem þú ert í"
Trausti: "Hver er þá munurinn á renndri peysu og renndum jakka?"
Hildur: "Það eru ekki til neinir renndir jakkar. Það eru úlpur."

Útsölur

2009-01-12T20:19:00.000Z

Það var mikið talað um það í kringum jólin að eftir áramót yrði algjör útsölu-veisla. Með það í huga var haldið í Kringluna á fyrsta útsölu degi. Ég fann þó fátt á dauðafæris-kjörum. Keypti flíkur í JACK&JONES: Skyrtu, buxur og peysu fyrir 14.000kr. og var nokkuð sáttur.

Næst á dagskrá var útsölumarkaður Next á Grensásvegi. 70% afsláttur var af öllum vörum auk þess sem 4 fyrir 2 tilboð var í boði. Uppskeran þar var jakki, buxur, skyrta og peysa fyrir 6000kr. Almennilegur díll það.

Nú vantar mig bara borvél á góðu verði. Eins gott að láta ekki blekkjast.

Slaufusvigar

2009-01-07T22:20:00.001Z

{Maðurinn sem gat ekki skrifað slaufusviga vakti mikla kátínu nemenda sinna. Að loka slaufusviga er sérstaklega erfitt. }

Blogg sem vitnað verður í.

2009-01-06T11:05:00.000Z

INNGANGUR

Hinn góðkunni símenntunarskóli MÍMIR sendi kynningarbækling á heimili landsmanna á dögunum. Á boðstólnum eru ýmis misáhugaverð námskeið. Ég efast um mikið vit sé í Feng Shui:

Feng Shui framhald:
Svala Rún Sigurðardóttir rifjar upp grunnþættina í Feng Shui. Farið verður yfir: Hvað er I Ching og hvernig það er notað í Feng Shui. Mismunandi orkutegundir í húsum og greiningu á þeim.

Annað er eflaust gagnlegt, tungumál, gítarnám og tölvukennsla t.d.

MEGINMÁL
Það sem mér finnst hins vegar standa upp úr er þetta:Af hverju er yfirskriftin ekki bara "Moggablogg, A til Ö". Er þetta annars einhvers konar æðsti draumur hvers bloggara, að fjölmiðlar vitni í hann?

Fréttir sjónvarpsins 6.janúar, Elín Hirst les fréttir.

"Bloggarinn skeleggi, Trausti Þorgeirsson skrifaði í dag snarpa samfélagsádeilu á bloggið sitt, trausti.blogspot.com. Trausti bendir á að símenntundarskólinn Mímir sé ekki allur þar sem hann er séður og bjóði upp á húmbúkksnámskeið um Feng Shui. Ekki nóg með það heldur vekur hann athygli á námskeiði um hvernig fólk eigi að blogga greinum sem fjölmiðlar eigi að vitna í. Trausti fer með ísköldum höndum um málið og veltir því upp hvort bloggarar eigi yfirhöfuð að velta sér upp úr athyglinni sem fjölmiðlar kunna veita þeim."

Eða hvað? Þetta blogg á kannski ekki skilið að komast í fréttirnar? Vantar kannski inngang, meginmál eða endi á það?
ENDIR.

Jólin

2009-01-03T16:00:00.000Z

Það er ekkert frí eins og jólafrí. Slíkt frí er gjarnan það eina sem veitir almennilega afslöppun. Gallinn við páskafrí eru yfirvofandi verkefni/próf. Sumarfrí hef ég ekki tekið nema einstaka viku í enda sumars. Jólafrí er hins vegar alltaf frábært.

Fyrsti kosturinn við jólafrí er hvernig það byrjar. Það er þægilegur endapunktur við próflok og ~~engin~~ lítil yfirvofandi pressa. Hápunktar jólafrísins eru svo aðfangadagur og gamlársdagur. Aðrir dagar eru þó alltaf góðir líka. Ekki á hverjum degi sem maður horfir á fótbolta frá 12 til 18.

Ég held að gæði fría sé í beinu sambandi við pressuna sem hvílir á manni á meðan þeim stendur. Helgar eru ágætar, en líða fyrir að oft er verkefni sem þarf að sinna. Annað fólk gerir líka kröfur til manns. Maður gæti þurft að svara í síma fyrir hádegi á laugardegi og sinna erindum. Í jólafríi er öll afslöppun leyfð. Það er í fínu lagi að liggja í sófanum allan daginn, samfélagið dæmir mann ekki.

Niðurstaða: Áfram jólafrí.

Jólamyndirnar 2008

2008-12-23T23:59:00.002Z

Séð var kvikmyndin Scrooged með Bill Murray. Hún er byggð á hinni kunnu sögu Dickens, í nútímaútfærslu. Ég sá þessa mynd einhvern tímann í æsku minni og fannst frábær; Nú sáum við Hildur þetta í tveimur lotum í gær og dag. -Kvikmyndin byggist á farsa og hæfileikum Bills Murrays til að vera fyndinn. Sem hann var ekki. Þetta var eiginlega nákvæmlega eins og að horfa á gamlan spaugstofuþátt. Niðurstaða, Scrooged: léleg. Vægi ekkert. Betra að halda sig við útgáfu Patricks gamla Stewarts

Séð var kvikmyndin Merry Christmases Mr. Lawrence. Slík fjallar um samskipti manna og árekstra menningarheima í japönskum fangabúðum. Nokkuð áhrifarík og flott mynd. Í orðum Sigurðar Páls Guðbjartssonar: Nothing spells christmas like David Bowie in a Japanese prison camp.

Kvikmynd sem var til á spólu heima og ég horfði gjarnan á í æsku minni er Santa Claus. Þýdd sem Jólasveinasaga á íslensku. Fyrir nokkrum árum horfði ég á hana með Hildi og gerði mér grein fyrir hversu léleg hún er. Kosturinn við hana er samt Dudley Moore. Allar ~~jóla~~myndir ættu að hafa Dudley Moore. Jólasveinasaga: Vægi ekkert.

Ítarefni: Áður hefur verið skrifað um jólamyndina Four Christmases.

Samhljóðar

2008-12-22T23:59:00.000Z

Ein af fáum partýspurningum sem ég hef í handraðanum er: "Hversu marga samhljóða geturðu sett í röð í gildu íslensku orði?" Þetta vekur alltaf lukku, eins og vænta má.

Ég las grein um málið í dagblaði, minnir mig, í æsku minni. Eins og margt sem maður les á unga aldri og finnst ægilega merkilegt hugsa ég stundum um orðið FINNSKT.

Gef oss í dag vort daglega blogg

2008-12-21T23:59:00.000Z

Ég tek ekki við athugasemdum um að kattamyndbönd séu þessu bloggi ekki samboðin.

Fávugl

2008-12-20T20:55:00.000Z

Hallur Hallsson fær verðlaun trausta.blogspot.com fyrir mestu sjálfumgleðina 2008. Þetta stóð tæpt á milli hans og Sigmundar Ernis Rúnarssonar. Sigmundur er að gera góða hluti með bókinni MAGNEU. Í hverri einustu auglýsingu er mynd af Sigmundi og téðri Magneu og alltaf er Sigmundur fyrir framan í aðalhlutverki.

Fyrstu verðlaun fær sem sé Hallur Hallsson, fréttamaðurinn góðkunni, sem flestir þekkja frá fréttamannadögum hans þar sem hann stóð við luktar dyr og vakti athygli á því að eitthvað ætti sér stað fyrir innan þær. Nú var hann að gefa út bók sem nefnist Váfugl. Í hverju einasta auglýsingahléi á ÍNN er núna auglýsing þar sem Hallur stendur með bókina sína og segir "Hvað. Er. Bak. Við. Hinar. Luktu. Dyr. Evrópu. Sambandsins?" Frekar sársaukafullt.

Í síðustu BIRTU kom svo þessi auglýsing:

Fyrir utan hina vandræðalegu stafsetningarvillu er þetta alveg ótrúlega skemmtilegt sjónarmið sem kemur þarna fram. Bókin hans er sko ÞÖGGUÐ. Hversu mikið umtal frá STÓRU fjölmiðlunum er eiginlega nauðsynlegt til að hlutirnir séu ekki þaggaðir? Mér liggur við að segja að vefsíðan trausti.blogspot.com sé þögguð. Halló, hvenær ætlar Kastljósið eiginlega að fjalla um bloggið mitt?

Annars er þetta enginn áfellisdómur yfir bókinni. Mig langar að lesa hana.

Twisting by the pool

2008-12-19T23:59:00.001Z

Ég, líkt og Jón Sigurðsson, fyrrum formaður Framsóknarflokksins, skorast ekki undan ábyrgð. Helga Þórey klukkaði mig fyrir margt löngu og komið er að skuldadögum.

1. Fjögur störf sem ég hef unnið um ævina:
Bílavarahlutasölumaður
Lóðaverktaki
Vísindamaður
Kennari

2. Fjórar íslenskar bíómyndir sem ég held upp á:
Sódóma Reykjavík
Magnús
Á köldum klaka
Íslenski Draumurinn

3. Fjórir staðir sem ég hef búið á:
Laugavegur 144
Eiríksgata 6
Ástún 10
Reynigrund 33

3. Einn staður sem ég myndi aldrei búa á:
Vatnsendi

4. Fjórir staðir sem ég hef heimsótt í fríum:
Eiðar
Klakksvík
Malmö
Xania

5. Fjórir sjónvarpsþættir sem mér líkar:
Dexter
Californication
Star Trek
Mythbusters

6. Fjórar síður sem ég skoða daglega:
reddit.com
blogg.gattin.is
igoogle.com
mbl.is

7. Fernt sem ég held upp á matarkyns:
skerpikjöt
grafl4x
roast beef
grænar baunir

8. Fjórar bækur sem ég hef oft lesið:
Ender's game
Taumhald á skepnum
A game of thrones
The Guns of the south

9. Fjórir staðir sem ég myndi helst vilja vera á núna:
Costa del sol
42nd og 3d.
Þar sem kreppan endar
Þar sem dauðafærin byrja

10. Fjórir bloggarar sem ég klukka:
Lárus, Konni, Hildur, Abbz,

Brandarar dagsins

2008-12-18T23:10:00.000Z

Brandari #1:
Tveir aðilar hefja nám við verkfræðideild Háskóla Íslands. Þeir hittast á salerninu í VR2, þar sem þeir hafa báðir þvaglát í pissuskál. Annar gerir sig líklegan til að ganga út að vatnsafköstun lokinni.
Aðili#1 segir:

Pff, í Veeersló var okkur kennt að þvo okkur um hendur eftir slíka athöfn!

Aðili#2 svarar að bragði:

Í MR var manni kennt að pissa ekki á hendurnar sínar!

Brandari #2:
Stalín heimsækir samyrkjubú til að athuga hvernig gangi að útfæra nýjustu 5 ára áætlunina. Hann spyr bóndann á staðnum hvort ekki gangi vel. Bóndinn svarar:

Jú félagi Stalín, kartöfluhaugarnir eru svo stórir að þeir ná alla leið upp til guðs!

Stalín svarar:

"En guð er ekki til!"

Bóndinn segir:

"Það eru kartöflurnar ekki heldur. félagi Stalín"

Er Jón Ólafsson höfundur Paperback Writer?

2008-12-18T00:53:00.007Z

Hinn umtalaði sjónvarpsþáttur, Kiljan, var á dagskrá Ríkisútvarpsins fyrr í kvöld. Lítum á upphafssekúndur slíks þáttar:

Stef þáttarins er augljóslega riff úr laginu Paperback Writer með Bítlunum. Heimild: 7 sekúndur inn í þetta myndband:

Allt í lagi með það. Það sem vekur athygli er hins vegar að Jón Ólafsson er skrifaður fyrir tónlistinni. Heimild:

Var Jón Ólafsson fimmti Bítillinn? Hvers konar vinnubrögð eru þetta? Þarf ekki einhver að segja af sér?

Bókarýni

2008-12-16T23:48:00.001Z

Lesnar hafa verið fjórar Neon bækur á seinnihluta þessa árs. Allar fjalla þær með einum eða öðrum hætti um stríð:

Í Þokunni eftir Philippe Cludel. Bókin gerist í frönsku þorpi í fyrri heimsstyrjöldinni. Lögreglumaður rannsakar morð á ungri stúlku, en bókin fjallar aðallega um fólkið í þorpinu og mannlegar tilfinningar. -Það tók mig nokkrar tilraunir að byrja á þessari bók, en þegar ég var kominn í gang var ég nokkuð sáttur. Persónurnar eru frekar áhugaverðar, en plottið er eiginlega ekkert. Niðurstaða: Þrjár stjörnur af fimm.

Út að stela hestum eftir Per Petterson. Ég man varla plottið í þessari, ef satt skal segja. Þetta snýst eitthvað um mann á gamalsaldri sem flytur í fjallakofa í Noregi. Þetta er svo rammasaga þar sem hann rifjar upp æsku sína í sveitinni og einhverjar hetjudáðir föður síns þegar landið var undir nasistum og blablabala. Aftur, nokkuð áhugaverðar persónur, en sagan er of þunn. Þrjár stjörnur.

Herra Pip eftir Lloyd Jones. Bókin gerist á Kyrrahafseyju árið 1990 þar sem allt er í vitleysu. Stríð og hörmungar. Eini hvíti maðurinn á svæðinu tekur að sér að uppfræða börnin í skólanum (grímulaust kynþáttahatur). Það gerir hann með því að lesa fyrir þau Great Expectations eftir Dickens. - Mér fannst þetta mjög góð bók. Áhugavert líka að fræðast um atburði sem ég hafði ekki hugmynd um fyrirfram. Fjórar stjörnur.

Þjófaborg eftir David Benioff. Bókin fjallar um ungan gyðing í Leníngrad meðan á umsátri nasista stendur í seinni heimsstyrjöld. Hann lendir í fangelsi og á von á dauða sínum en fær í staðinn það ómögulega verkefni að redda 12 eggjum fyrir brúðkaupsveislu dóttur ofursta, ásamt öðrum manni. Mér fannst þetta frábær bók. Sujmptatískir karakterar, áhugavert sögusvið og snjöll flétta. Endirinn var fyrirsjáanlegur, en það truflaði mig lítið. Fimm stjörnur. Klárlega jólabjókin í ár.

Kötturinn í kassanum

2008-12-15T23:59:00.000Z

Cat Stuck in a Box @ Yahoo! Video

Korputorg

2008-12-14T23:48:00.004Z

Er ég einn um að finnast það langsótt hugmynd að keyra 20 km. út í sveit til að kaupa eina jólagjöf?

Laugardagur 13.12 -2008

2008-12-13T23:39:00.000Z

09:00
Vakna við að síminn hennar Hildar hringir. Kennarinn hennar saknar ritgerðar sem komst ekki til skila. Fer á fætur. Drekk kaffi. Spila Mario Kart. Það er mjög hressandi að fara snemma á fætur um helgar.

12:45
Horfi á Arsenal-Middlesbro. Svekkjandi leikur. Hefðum átt að skora annað mark strax. Magnað hvað fyrrverandi Arsenal leikmenn eru duglegir við að skora á móti okkur. Aliadiere að kyssa Middlesbro skjaldarmerkið olli mér velgju. 1-1 var niðurstaðan. Fáránlegt.

15:00
Fer í Kringluna. Kaupi nokkrar jólagjafir. Kem við í Bónusi. Kaupi í matinn. Í Bónusi var epísk röð af fólki. Það stoppaði ekki ~13 ára ungling í því að standa við kassa í 20 mín. til að kaupa sér einn euroshopper orkudrykk.

17:00
Elda kjúkling. Nota uppskrift úr VEISLU, bók frá Nóatúni. Uppskriftin er svona:

Hráefni:
1 kjúlli
Hnefi af kóríander
Einn hvítlaukur
2 chili pipararar
200 ml. ólífuolía
börkur af einni sítrónu
matskeið af engiferi
salt, pipar

Aðferð: saxið hráefni og blandið saman í skál. Skerið gat á húð kjúklingsins. Troðið helmingi hráefnis undir húðina. Nuddið afganginum á húðina og setjið ögn inn í kjúklinginn. Bakið í 180° heitum ofni í klukkara.

19:00
Kjúklingur er borinn fram ásamt frönskum og bernessósu. Nauðsynlegt að gera vel við heimilismenn í próflestri. Kjúklingur reyndist bragðgóður. Líkur á að hann verði borinn fram aftur.

21:00
Horfi á Barcelona - Real Madrid. Hildur horfir á THE NEW WORLD. Mynd um Pocahontas. Ég man að ég fór á teiknimyndina í bíó með Maríönnu. Eftirminnilegri er þó hljóðbókin sem Maríanna átti. Framan á bókinni voru myndir sem hægt var að ýta á til að framkalla nöfn persóna þegar þau komu fyrir í bókinni. Stórkostleg uppfinning. JOHN SMITH JOHN SMITH pocaHONTAS pocaHONTAS. Af hverju eru svona bækur ekki til lengur?

23:30
Blogga, fer að sofa. Þessi dagur hefur verið lærdómsríkur. Ég hef tekist á við daginn af jákvæðni og uppbyggilegum hugsunarhætti. Ég var tilbúinn til að gera mistök og læra af þeim. Vonum að sunnudagurinn beri góða hluti í skauti sér.

Heilbrigðiskerfið

2008-12-12T23:59:00.000Z

Eftir að hafa verið veikur og þreyttur í 4 vikur ákvað ég að leita mér læknishjálpar á mánudaginn. Ástand mitt var ekki (mjög) alvarlegt, svo ég átti væntanlega að leita til heimilislæknis. Það er ekki alveg jafneinfalt fyrirtæki og maður gæti haldið. Síðast þegar ég fór til heimilislæknis bjó ég í Kópavogi. Svo er ekki lengur. Hvað skal gera? Tekur heilsugæsla Kópavogs á móti mér? Er ég aufúsugestur á heilsugæslu Seltjarnarness? Hvað með sjúkraskrárnar? Hverju svarar Heilsugaeslan.is ? Engu, nákvæmlega engu!

Þetta er einn af þessum hlutum sem lærast með því að gera. Maður gerir það sem manni finnst eðlilegt á hverjum tíma og lærir svo af hneykslun annarra hvað er það rétta. Allavega, heilsugæsla Seltjarnarness vildi taka við mér á miðvikudaginn. Þar skoðaði ágætur læknir mig, spurði hvort ég væri áfengissjúklingur eða dópisti, og bókaði svo blóðprufu. Fyrir þetta voru greiddar 1000kr. Þetta gjald mætti augljóslega vera hærra. Allavega fannst mér þetta ódýrt.

Morguninn eftir fór ég í blóðprufu. Indæl kona herti ól um upphandlegg minn og stakk svo nál inn olnbogabótina. Ekki sársaukafullt, en samt er alltaf næstum liðið yfir mig þegar þetta er gert. Gæti ekki verið blóðgjafi. Þegar nálin er tekin úr er settur bómull á sárið. Samt blæðir ekki úr. Undraheimar læknavísindanna. Fyrir þetta greiddust 1200 kr. Ódýrt?

Niðurstöður blóðprufunar bentu ekki til kóleru, eins og mig hafði grunað, heldur heilbrigðis. Ég er með 4,8 óskilgreindar mælieiningar í kólesteról. Sem er víst ágætt. Skjaldkirtils(hormón?) voru hins vegar á mörkunum, svo ég á að koma í aðra blóðprufu eftir 2 mánuði.

Ég virðist hafa sogast inn í heilbrigðiskerfið. Það verður spennandi hvert þeir senda mig eftir blóðprufuna í febrúar. Beinmergssýnatöku?

Niðurstaða: Áfram heilbrigðiskerfið. Bú á hálsbólgu (sem ég er enn þá með, læknirinn hefur minnstar áhyggjur af því. Skjaldkirtilsmælingin, það er það sem skiptir máli -eftir 2 mánuði).

Kreppan farin að bíta

2008-12-11T23:25:00.000Z

Jæja, þá er kreppan loksins farin að höggva þar sem særir. Á Ríkisútvarpinu hefur verið á dagskrá afar áheyrilegur þáttur sem nefnist Uppruni tegundanna. Núna er í gangi fínn þáttur um Clapton. En nei, það þarf að halda uppi Spaugstofunni, svo Uppruni tegundanna fellur á sverðið um áramótin.

Ég legg til að Palli Magg vinni eftir þessari aðgerðaáætlun til niðurskurðar og stórkostlegrar bætingu dagskrárefnis:
1. Segja upp öllu starfsfólki sjónvarpisins.
2. Kaup fest á öllum Star Trek þáttaröðunum, frá upphafi.
3. Star Trek sýnt alla daga, allan daginn, alltaf.
4. Útvarpið má halda óbreyttri starfsemi.

TRÉSMIÐJA: fewfpoje KREPPAN feofw STÍM

2008-12-10T22:35:00.001Z

Eina borgin sem ég hef komið til í Frakklandi er Toulouse. Hversu margir Íslendingar ætli fylli þennan flokk? Mér líður allavega eins og ég sé sérstakur. Mikilvægi aukið.

Það eina sem ég sé eftir er að hafa ekki keypt hina fagurbleiku treyju FC Toulouse

40 evrur virtust miklir peningar á þeim tíma.

Það væri ágætt að setja sér það markmið að koma eingöngu til fjórðu stærstu borgarinnar í öllum löndum sem maður heimsækir héðan í frá. Á skammtímaplaninu:

Köln í Þýskalandi
Sevilla á Spáni
Ghent í Belgíu

Týpískur dagur í fyrrihluta desember

2008-12-09T23:59:00.000Z

Ég vakna kl. 8:15. Borða All Bran með sojamjólk, blaða í gegnum Fréttablaðið. Rek Hildi á lappir (jæja allt í lagi, meira öfugt). Legg af stað í skólann kl. 8:30. Sit yfir prófum frá 9 til 13. Klukkan 10:30 er tækifæri til að nærast. Í dag voru ólgandi lambaskankar í matinn. Hver getur fúlsað við því kl. 10:30 ?

Eftir kl. 13 reynir á viljastyrkinn til að fara yfir próf og verkefni. Yfirferð varir svo meira og minna fram að miðnætti. Ég geri ráð fyrir að skila einkunnunum næsta mánudag. Það verður gleðiefni. Það er skrítið að að sumu leyti er miklu þægilegra að vera nemandi þegar kemur að prófum. Umstangið í kringum þetta er ótrúlegt. Miklu þægilegra að mæta í próf, skrifa það sem maður veit og bíða svo eftir dómi yfirvaldsins.

Bíðum spennt eftir týpískum degi í seinnihluta desember. Einnig þekkt sem jólafrí.

Hefur framtíð Spaugstofunnar verið tryggð?

2008-12-08T22:15:00.000Z

Það eru ánægjulegar fréttir að nefskatturinn fyrir ríkisútvarpið sé kominn upp 18.000 kr. á mann. Þetta heimili borgar því einungis 36.000kr. á næsta ári fyrir að halda úti Spaugstofunni.

Það eina sem eykur á gleðina er umræðan úr fréttunum í gær að ríkið kaupi prentsmiðju e-s blaðsins. Enda verði að "tryggja hér blaðaútgáfu". Ég bíð allavega spenntur eftir Spaugstofunni á pappírsformi.

Annars er þetta mjög skrítin umræða með ríkisútvarpið. Það hefur víst "brennt í gegnum allt eigið fé". Hvernig stendur á því? Kom eitthvað á óvart varðandi reksturinn? Átti ríkisútvarpið von á fleiri áskrifendum? Á hvaða hátt gekk viðskiptamódelið ekki upp? Af hverju er Páll Magnússon ekki rekinn?